BUU: Bıyl 378 myń sırııalyq Lıvannan óz otanyna oraldy
ASTANA. KAZINFORM — 2025 jyly Lıvannan 378 myń sırııalyq bosqyn óz otanyna oralǵan. Bul derekti BUU-nyń Bosqyndar isi jónindegi Joǵarǵy komıssarynyń basqarmasy óziniń H áleýmettik jelisindegi paraqshasynda jarııalady, dep habarlaıdy Anadoly.
Erikti qaıtarý sırııalyq bosqyndardy elge qaıtarý jónindegi úkimettik jospar aıasynda júzege asyrylyp jatyr. Bul jospar Lıvannyń Bas qaýipsizdik basqarmasymen jáne BUU-nyń Bosqyndar isi jónindegi Joǵarǵy komıssarynyń basqarmasymen birlesip iske asyrylady.
Lıvan bıligi málimdegendeı, 12-shi kezeń aıasynda úkimettik baǵdarlamany júzege asyrý úshin el astanasy Beırýtte jınalǵan sırııalyqtar El-Masna ótkizý beketi arqyly shekarany kesip ótip, Sırııaǵa jol tartqan.
Lıvan úkimeti maýsym aıynda sırııalyq bosqyndardy óz otanyna qaıtarý jónindegi kópkezeńdi jospardy jarııalaǵan. Baǵalaýlarǵa sáıkes, Sırııadaǵy azamattyq soǵys kezinde shamamen 1,8 mıllıon sırııalyq Lıvanda baspana tapqan, olardyń shamamen 880 myńy qaıtarý úshin BUU-nyń Bosqyndar isi jónindegi Joǵarǵy komıssarynyń basqarmasyna júgingen.
2024 jyly 8 jeltoqsanda Bashar Asad rejımi qulaǵannan keıin, soǵys jyldary kórshi elderde turǵan sırııalyqtardyń elge qaıtarylý protsesi aıtarlyqtaı jedeldegen.
Buǵan deıin Izraıl premer-mınıstri Bınıamın Netanıahý seısenbi kúni jaralanǵan sarbazdar aldynda sóılegen sózinde Damask el astanasynan Hermon taýyna irgeles aýdandarǵa deıin demılıtarızatsııalanǵan aımaq qurǵan jaǵdaıda Sırııamen kelisimge qol jetkizý «múmkin» ekenin aıtty.