BUU baıandamasy: bir jylda ashtyqqa shaldyqqandar sany eki esege artty
ASTANA. KAZINFORM – Azyq-túlik jetispeýshiligi jaǵdaıynda ómir súrip jatqan jandar sany keıingi jyly eki esege artty. Bul týraly Nıý-Iorkte Azyq-túlik daǵarysyna baılanysty jahandyq baıandamada aıtyldy.
Atalǵan qujatty daıyndaýǵa BUU-nyń birneshe vedomstvosynyń ókilderi atsalysqan, dep habarlaıdy Tájikstannyń Hovar agenttigi «BUU jańalyqtary» saıtyna silteme jasap.
BUU asharshylyqtyń deńgeıin ólsheıtin kúrdeli shkala engizdi. Eń sońǵy, ıaǵnı besinshi saty adamdardyń múldem jeıtin tamaǵy joq ekenin, sonyń saldarynan olar aýrýǵa shaldyǵyp, ólip jatqanyn kórsetedi.
BUU Azyq-túlik jáne aýyl sharýashylyǵy uıymynyń bas ekonomısti Maksımo Toreronyń aıtýynsha, joǵaryda atalǵan satydaǵy adamdar sany 2023 jyly 705 myń bolsa, 2024 jyly 1,9 mln-ǵa jetken. Mundaı qarqyndy ósimge Gaza men Sýdandaǵy qaqtyǵystar, El-Nıno (Klımatqa aıtarlyqtaı áserin tıgizip otyrǵan Tynyq muhıtynyń evatorlyq bóligindegi sý betindegi temperatýranyń ózgerýi) áserinen bolyp otyrǵan qurǵaqshylyq, azyq-túlik qymbatshylyǵy zardabyn tıgizip otyr.
Dúnıejúzilik azyq-túlik baǵdarlamasynyń bas ekonomısti Arıf Hýseın qonysyn ózgertken adamdar sanynyń artýyna nazar aýdardy.
«2023 jyly májbúrli túrde qonys aýdarǵandar sany 90 mln adam bolsa, 2024 jyly 99 mln-ǵa jetti», - dedi ol.
ıÝNISEF uıymynyń balalardy tamaqtandyrý men damytý boıynsha dırektory balalardyń joqshylyqta ómir súrip jatqanyna nazar aýdardy. Ol álemniń 8 elinde balalardyń ashtyqtan toryǵýy shekten shyqqanyn jetkizdi. Alańdatarlyq málimetter Kamerýn, Chad pen Iemennen kelip jatyr.
