BUU basshysy Sıdneıde adamdarǵa jasalǵan shabýyldy aıyptady

ASTANA. KAZINFORM – Birikken Ulttar Uıymynyń Bas hatshysy Antonıý Gýterrısh Avstralııanyń Sıdneı qalasynda Hanýkany atap ótý úshin jınalǵan evreı otbasylaryna jasalǵan «jeksuryn» shabýyldy qatań aıyptady. Bul týraly BUU Jańalyqtary habarlady. 

— Hanýkanyń alǵashqy kúninde beıbitshilik pen jaryqtyń túnekti jeńý keremeti dáripteletin merekede meniń júregim búkil álemdegi evreı qaýymdastyǵymen birge, — dep jazdy ol.

Habarlamalarǵa sáıkes, qarýlanǵan eki adam Sıdneıdegi Bondı jaǵajaıynda Hanýkany toılap jatqan adamdarǵa oq jaýdyrǵan. Keminde 15 adam qaza tapty. Qurbandardyń ekeýi polıtsııa qyzmetkeri. El bıligi bul oqıǵany terrorıstik akt dep baǵalap otyr. Shabýyl jasaýshylardyń biri kóz jumǵan, ekinshisi ustaldy.

BUU Bas hatshysy Avstralııa halqy men úkimetine, sondaı-aq eldegi jáne búkil álemdegi evreı qaýymdastyǵyna yntymaqtastyǵyn bildirdi.

Ol «antısemıtızmniń barlyq túrin sózsiz aıyptaıtynyn» atap ótip, dinı qaýymdastyqtarǵa jáne beıbit jıyndarǵa jasalatyn shabýyldar tózimdilik, beıbit qatar ómir súrý jáne adamdyq qadir-qasıet sııaqty negizgi qundylyqtarǵa nuqsan keltiretinin málimdedi.

Terrorıstik akt bolǵan sátte Antonıý Gýterrısh Saýd Arabııasynyń Er-Rııad qalasynda ótken BUU-nyń Órkenıetter alıansynyń jahandyq forýmyna qatysyp jatqan.

Bul bastama 20 jyl buryn mádenıetter men dinder arasyndaǵy ózara qurmet pen túsinistikti nyǵaıtý maqsatynda qurylǵan.

Alıanstyń Joǵarǵy ókili Mıgel Anhel Moratınos ta shabýylǵa baılanysty «qatty kúızelgenin» aıtty.

— Qaza tapqandardyń otbasylaryna shyn júrekten kóńil aıtamyn jáne zardap shekkenderdiń tezirek saýyǵyp ketýin tileımin, — dep jazdy ol X platformasynda. 

Aıta ketelik Hanýkka merekesin toılaý kezinde Sıdneı jaǵajaıynda atys boldy. Sıdneıdegi lańkesterdiń ákesi men balasy ekeni anyqtaldy.