BUU basshysy «saýda soǵysynyń» jahandyq ekonomıkaǵa qaýip tóndiretinin eskertti

ASTANA. KAZINFORM – BUU Bas hatshysy Antonıý Gýterrısh «saýda soǵysynda jeńimpazdar joq» ekenin eskertti. Bul týraly juma kúni onyń resmı ókili Stefan Dıýjarrık málimdedi, dep habarlaıdy Sınhýa aqparat agenttigi. 

Keń aýqymdy oppozıtsııaǵa qaramastan, AQSh prezıdenti Donald Tramp sársenbi kúni keıbir saýda seriktesteri úshin 10 paıyzdyq «eń tómengi bazalyq tarıf» jáne joǵary baj salyǵyn engizip, «balamaly tarıf» dep atalatyn sharalardy engizý týraly buıryqqa qol qoıdy. 

Dúnıejúzilik uıym basshysynyń Aq úıdiń sońǵy tarıf saıasatyna qatysty túsiniktemelerine qatysty suraqqa S. Dıýjarrık «saýda soǵysynda jeńimpazdar joq» dep jaýap berdi.

– Qazir bizdi qazirgi ýaqyttaǵy jaǵdaıǵa tótep bere almaıtyn elder alańdatyp otyr, - dep qosty baspasóz hatshysy. 

Ol jahandyq saýda soǵysy BUU-nyń Turaqty damý maqsattaryna qol jetkizýge «keri áser etetinin» atap ótti.

BUU Saýda jáne damý jónindegi konferentsııasynyń (ıÝNKTAD) juma kúni taratylǵan málimdemesinde Qurama Shtattar engizgen tarıfter osal elderge zııan tıgizetini aıtylady. Mátinde iri ekonomıkalar jappaı jańa tarıfter engizýge daıyndalyp jatqanda, «jahandyq saýda júıesi daǵdarysty kezeńge ótip, ósim, ınvestıtsııa jáne damýdyń ilgerileýi táýekelge ushyrap otyr» delingen.