BUU basshysy «áıelderge ınvestıtsııa salýǵa» shaqyrdy
ASTANA. KAZINFORM – Áıelder men qyzdar úlken jetistikterge qol jetkizdi – olar bar kedergilerdi buzyp, stereotıpterdi joıyp, ádil de teń álemge qaraı ilgerileýde. Bul týraly BUU Bas hatshysynyń Halyqaralyq áıelder kúnine arnalǵan beıneúndeýinde aıtylǵan, dep habarlaıdy BUU jańalyqtar ortalyǵy.
«Bul rette olar úlken kedergilerge tap bolady. Mıllıardtaǵan áıelder men qyzdar margınalızatsııa, ádiletsizdik jáne kemsitýshilikpen betpe-bet keledi, al áıelderge qatysty jalǵasyp jatqan zorlyq-zombylyq indeti búkil adamzat úshin uıat jaǵdaı», - dep jalǵastyrdy Antonıo Gýterrısh.
BUU basshysynyń aıtýynsha, qazirgi álem áli de er adamdar ústemdik etetin «myńdaǵan jyldardaǵy bılik qatynastaryn» kórsetedi. Progreske qaýip tónip tur, óıtkeni áıelderdiń quqyqtaryna aıaýsyz shabýyl jasalýda.
«Damýdyń qazirgi qarqynynda quqyqtyq teńdikke úsh júz jyldan keıin ǵana qol jetkizýge bolady. Biz tezirek qozǵalýymyz kerek», - dedi A.Gýterrısh.
BUU Bas hatshysy óz quqyqtary úshin kúresetin áıelder men qyzdardy qoldaýǵa jáne progresti jedeldetýge shaqyrdy. Onyń aıtýynsha, bıylǵy Halyqaralyq áıelder kúniniń
«Áıelderge ınvestıtsııa» taqyryby patrıarhatty joıý aqshany qajet etetinin eske salady.
A.Gýterrısh «aldyńǵy qatarda» turǵan áıelder uıymdaryn qoldaý, áıelderge qatysty zorlyq-zombylyqty toqtatý jáne áıelderdi ekonomıkaǵa, tsıfrlyq tehnologııaǵa, beıbitshilik ornatýǵa jáne klımattyń ózgerýine qosýǵa járdemdesý baǵdarlamalaryna ınvestıtsııalaý qajettiligi týraly aıtty.
«Sondaı-aq biz bıznes, qarjy, ortalyq bankter men qarjy mınıstrlikterindegi kóshbasshy áıelderdiń sanyn kóbeıtýimiz kerek. Áıel quqyǵy – ádil, beıbit jáne gúldengen qoǵamǵa aparatyn dáleldengen jol. Bul bárimizge paıdaly», - dedi BUU basshysy.
