BUU basshysy áıelderdiń quqyqtaryn qorǵaý úshin áreket etýge shaqyrdy

ASTANA. KAZINFORM – BUU Bas hatshysy Antonıý Gýterrısh juma kúni jyl saıyn 8 naýryzda atalyp ótetin Halyqaralyq áıelder kúni qarsańynda barlyq áıelder men qyzdardyń quqyqtaryn qorǵaý jáne ilgeriletý úshin áreket etýge shaqyrdy, dep habarlaıdy Sınhýa aqparat agenttigi. 

- Biz búgin Halyqaralyq áıelder kúnin merekeleý úshin ǵana emes, adamzat múddesi úshin búkil álemdegi barlyq áıelder úshin teńdik, damý jáne beıbitshilik jolynda tabandy, birikken jáne taısalmaı ilgerileý úshin jınalyp otyrmyz, - dedi A.Gýterrısh Nıý-Iorktegi BUU shtab-páterde ótken sharada.

Ol bıyl Beıjińde ótken áıelderdiń jaǵdaıy jónindegi tórtinshi Dúnıejúzilik konferentsııasyna 30 jyl tolyp otyrǵanyn, onda áıelder quqyǵy – adam quqyǵy ekeni taǵy bir márte rastalǵanyn atap ótti. 

Sodan beri áıelder kóptegen kedergilerdi jeńip, qoǵamdy ózgertti. 

- Alaıda bul qıyn-qystaý tabystar áli de názik jáne jetkilikti deńgeıde emes», - dep málimdedi A.Gýterrısh.

BUU Bas hatshysynyń aıtýynsha, zorlyq-zombylyq, kemsitýshilik jáne ekonomıkalyq teńsizdik bizdiń qoǵamdaǵy problemalar bolyp qalyp otyr. 

Ol búkil álemde áıelderdiń quqyqtaryna shabýyl jasalyp jatqanyn, ǵasyrlar boıy qalyptasqan kemsitýshilik jańa qaýip-qaterlermen ýshyǵyp jatqanyn atap ótti. 

- Biz teń quqyqty engizýdiń ornyna shovınızm men áıel ataýlyny jaratpaýshylyq engizilip jatqanyn kórip otyrmyz.

Progress keri baǵytta júrip jatqanda biz shydaı almaımyz. Biz qarsy turýymyz kerek, - dep úndedi A.Gýterrısh.

Buǵan deıin BUU Bas Assambleıasy uıymnyń aımaqtyq ortalyǵyn Almatyda ashý týraly qarar qabyldaǵan.