BUU basqarmasynyń esebinshe, Gaıtıde zilzala qurbandarynyń sany 112 myń adamnan asty, taǵy 194 myń adam jaralandy
ASTANA. Qańtardyń 26-sy. QazAqparat - Gaıtıde bolǵan zulmat zilzalanyń qurbandarynyń sany 112 myń adamnan asty, taǵy 194 myń adam jaralandy. BUU-nyń Gýmanıtarlyq máselelerdi úılestirý jónindegi basqarmasy osyndaı málimet taratty,
dep habarlaıdy ITAR-TASS agenttigi.
Gaıtıdegi gýmanıtarlyq máselelerdi úılestirýshi atalmysh vedomstvonyń málimetterine súıensek, qańtardyń 24-indegi jaǵdaı boıynsha, baspanaǵa muqtaj adamdardyń sany 1 mıllıonǵa jetedi, olardyń kópshiligi el astanasy -Port-o-Prenste turatyndar. Qala jedel shatyrly qalashyqtardyń turǵyzylýyna muqtaj.
Gaıtı úkimetiniń esepteýleri boıynsha, ókimet bergen kólikterge minip, 235 myńdaı adam Port-o-Prens qalasyn tastap ketken jáne kórshi qalalarǵa baryp jaıǵasqan.
Dúnıejúzilik densaýlyq saqtaý uıymy, ázirge elde ınfektsııalyq indet oshaqtary tirkelmegenin habarlaýda. Halyq arasynda azyq-túlik, aýyz sý taratylýda. BUU-nyń Dúnıejúzilik azyq-túlik baǵdarlamasynan jáne basqa da uıymdardan azyq-túlik qorjyndaryn alǵan adamdardyń sany 500 myńǵa jetti. Biraq ta, azyq-túlikke muqtajdardyń sany 2 mıllıondaı adam dep baǵalanýda.
