BUU bas quqyq qorǵaýshysy Iran men Izraıldi gýmanıtarlyq zańdardy saqtaýǵa shaqyrdy
ASTANA. KAZINFORM – Qazirgi ýaqytta Izraıl men Iran almasyp jatqan zymyran jáne ushqyshsyz soqqylar beıbit turǵyndarǵa eleýli zııan keltirip, búkil aımaqta qaqtyǵysty órshitý qaýpin tóndirip otyr. Bul týraly BUU Adam quqyqtary jónindegi Joǵarǵy komıssarynyń beısenbi kúni taratqan málimdemesinde aıtylǵan, dep habarlaıdy «BUU jańalyqtary».
— Jappaı zymyran jáne áýe soqqylary, sondaı-aq ushqyshsyz basqarylatyn ushaqtardyń shabýyldary qazirdiń ózinde áskerı maqsattardan asyp túsetin aıtarlyqtaı zııan keltirip otyr. Olar beıbit turǵyndardyń ólimi men jaraqat alýyna jáne azamattyq obektilerge, sonyń ishinde medıtsınalyq ınfraqurylymǵa, turǵyn úılerge, sý qubyrlaryna, munaı jáne gaz nysandaryna zııan keltirdi, — dep atap ótti Folker Tıýrk.
Joǵarǵy komıssardyń Iran bıligine silteme jasap keltirgen málimetke sáıkes, bul elde 224 adam qaza boldy. Tıýrk qosyp ótkendeı, quqyq qorǵaý uıymdary qurbandar men jaraqat alǵandar sany eki ese kóp ekenin habarlaıdy. Izraıldiń resmı derekteri kem degende 24 adam qaza taýyp, 840-tan astamy jaraqat alǵanyn kórsetip otyr.
— Iran astanasynyń úlken aýmaqtaryn qamtyǵan evakýatsııa týraly eskertýlerden keıin ásirese Tegeranda beıbit turǵyndar úılerin tastap ketýge májbúr bolyp otyr, — dep qosty Joǵarǵy komıssar.
Tıýrk halyqaralyq gýmanıtarlyq quqyqtyń eki tarap úshin de mindetti, áskerı operatsııalar kezinde aıyrmashylyq, shamalastyq jáne saqtyq qaǵıdattaryn tolyq saqtaýdy talap etetin, beıtarap shabýyldarǵa, sondaı-aq azamattarǵa nemese azamattyq obektilerge qasaqana shabýyl jasaýǵa tyıym salatyn negizgi qaǵıdalar týraly eske saldy.
— Azamattyq tulǵalar áskerı qımyldardy júrgizý kezinde janama zııan retinde qaralýy qorqynyshty. Eki jaqtyń joǵary laýazymdy sheneýnikteriniń qoqan-loqylary men jalyndy sózderi beıbit turǵyndarǵa zııan tıgizý nıetin tanytyp otyr. Eskalatsııa shıyrshyǵynan shyǵýdyń jalǵyz joly — barynsha ustamdylyq, halyqaralyq quqyqty tolyq saqtaý jáne kelissóz ústeline qaıta oralý, — delingen málimdemede.
Buǵan deıin QR Syrtqy ister mınıstrligi Iran men Izraılde júrgen azamattaryna eskertý jasaǵanyn jazǵan bolatynbyz.