BUU Bas hatshysynyń arnaıy ókili «Jýsan» operatsııasyn joǵary baǵalady

NUR-SULTAN. QazAqparat– QR Syrtqy ister mınıstri Beıbit Atamqulov BUU Bas hatshysynyń arnaıy ókili - BUU Ortalyq Azııadaǵy preventıvtik dıplomatııa jónindegi óńirlik ortalyǵynyń basshysy Natalıa Germandy qabyldady, dep habarlaıdy QazAqparat mınımtrliktii baspasóz qyzmetine silteme jasap.

Kezdesý barysynda beıbitshilik pen qaýipsizdik, terrorızmge qarsy kúres, sý-energetıkalyq problematıkasy, preventıvti dıplomatııany nyǵaıtý salalaryndaǵy óńirlik yntymaqtastyq máseleleri talqylandy.

Syrtqy saıası vedomstvosynyń basshysy Qazaqstannyń BUU Óńirlik ortalyǵynyń qyzmetin qoldaıtyn atap ótti. Ornyqty damý, beıbitshilik jáne qaýipsizdikti qamtamasyz etý salalaryndaǵy Qazaqstannyń bastamalarymen tanystyrdy.

N. German terrorızmge qarsy kúreske Qazaqstannyń úlesi, atap aıtqanda, Sırııa aýmaǵynan qazaqstandyq azamattardy shyǵarý jónindegi «Jýsan» gýmanıtarlyq operatsııasynyń nátıjelerin joǵary baǵalady. Operatsııa nátıjesi boıynsha áskerı qaqtyǵys bolyp jatqan aýmaqtarynan 600-ge jýyq azamat shyǵarylǵan. N. Germannyń aıtýynsha, uqsas operatsııany ótkizý boıynsha tájirıbeni qabyldaýǵa qyzyǵýshylyqty bildirip, Qyrǵyzstan jáne Tájikstan Qazaqstannyń jolyn tańdady.

Óńirlik ortalyǵynyń basshysy áıelder men jastardy qaqtyǵystardy aldyn alý men sheshý, beıbitshilik qurý, bitimgershilik protsesterine qatystyrýǵa baǵyttalǵan Óńirlik ortalyǵynyń jańa bastamalaryn habarlady.

Taraptar transshekaralyq sý paıdalaný jáne qorǵaý máselelerine erekshe kóńil bóp, sý yntymaqtastyǵy boıynsha Ortalyq Azııa elderimen birlesken kópjyldyq tujyrymdamasyn daıyndaý qajettigin atap etildi.

BUU Ortalyq Azııadaǵy preventıvti dıplomatııa jónindegi óńirlik ortalyǵy qaqtyǵystardy aldyn alý salasyndaǵy óńirlik elderiniń áleýetin nyǵaıtý úshin 2007 jylǵy 10 jeltoqsanda Ashǵabat qalasynda Ortalyq Azııa elderiniń bastamasymen ashylǵan.

Eske salaıyq, «Jýsan» gýmanıtarlyq operatsııasy - aýqymdy aktsııa. Bul bastamany Tuńǵysh Prezıdent - Elbasy Nursultan Nazarbaev usyndy. 2018 jyldan beri júzege asyrylýda.

Sırııadan qazaqstandyqtardyń alǵashqy legi bıylǵy 6 qańtarda elge jetkizilgen bolatyn.

7-9 mamyr kúnderi atalmysh elden Qazaqstannyń taǵy 231 azamaty oraldy.

Keshendi sharalar nátıjesinde qaqtyǵys aımaǵynan elimizge jalpy 357 bala qaıtaryldy.

28-31 mamyrda «Jýsan» arnaıy gýmanıtarlyq aktsııasynyń sońǵy kezeńi ótkizilgen edi.