BUU Bas hatshysy Taıland ókimeti men oppozıtsııasyn zorlyq-zombylyqty toqtatýǵa shaqyrdy
ASTANA. Sáýirdiń 23-i. QazAqparat - BUU Bas hatshysy Pan Gı Mýn Taılandtaǵy jaǵdaıdyń ýshyǵýyna alańdaýshylyq bildirdi jáne jaqtaýshylarynyń arasyndaǵy qaqtyǵystar kisi ólimine ákelgen el úkimeti men oppozıtsııasyn sabyrǵa shaqyrdy, zorlyq-zombylyqtan bas tartýǵa úndedi. Bul týraly jýrnalısterge BUU Bas hatshysynyń resmı ókili Martın Neskırkı habarlady.
Taılandta ókimet pen oppozıtsııa jaqtaýshylarynyń arasyndaǵy qaqtyǵystyń jalǵasqanyna birneshe aptanyń júzi boldy. Polıtsııa men Bangkok ortalyǵynda shatyrly lager tikken ereýilshilerdiń arasyndaǵy qaqtyǵystardyń saldarynan osy ýaqytqa deıin toǵyz adam qurban boldy. Keshe qala oryn alǵan birneshe jarylystyń saldarynan úsh adam kóz jumdy, jergilikti buqaralyq aqparat quraldary bul jarylystardy ókimet pen oppozıtsııanyń qaqtyǵysymen baılanystyryp otyr.
«BUU Bas hatshysy Taılandtaǵy jaǵdaı men onyń ýshyǵý yqtımaldyǵyna qatty alańdap otyr. Bas hatshy eki jaqty ta zorlyq-zombylyqty toqtatýǵa, adam ólimine jol bermeýge, sondaı-aq problemany beıbit jolmen, dıalog arqyly sheshýge úndeýde», -dep habarlady onyń resmı ókili.
«Barlyq taraptan sabyrlyq talap etetin sát týdy», - dedi Pan Gı Mýnnyń sózine silteme jasaǵan onyń resmı ókili.
