BUU Bas hatshysy: Tabıǵı apat álem elderine jyl saıyn 300 mlrd shyǵyn ákeledi

ASTANA. QazAqparat - Japonııadaǵy Sendaı qalasynda senbide BUU apattar qaýpin azaıtý jónindegi ІІІ Dúnıejúzilik konferentsııa óz jumysyn bastady.

Oǵan BUU Bas hatshysy Pan Gı Mýn, Japonııa premer-mınıstri Sındzo Abeni qosa alǵanda 160-tan astam eldiń ókilderi men memleket basshylary, úkimet músheleri qatysýda.

«Bul konferentsııanyń aıasynda talqylaıtyn másele barsha álemniń mıllıondaǵan turǵyndary úshin mańyzdy bolmaq, - dedi kirispe sózinde Pan Gı Mýn. - Pikirtalas aıasynda tap osy jandardyń suranysyn basty nazarǵa alýymyz qajet».

BUU Bas hatshysy on jyl buryn qabyldanǵan Hıog negizgi baǵdarlamasynyń myńdaǵan adamdardy qutqarýǵa múmkindik bergendigin atap ótti. «Qazir de qoǵamdy qoldap, berilgen ýádeni oryndaı otyryp, álemniń artyp kele jatqan suranysyna jaýap berýimiz qajet», - dep qosty ol.

BUU baǵalaýy boıynsha, jyl saıyn tabıǵı apat shyǵyny 300 mlrd dollarǵa jetedi. Pan Gı Mýnnyń sózine qaraǵanda, eger ár jyly apat qaýpiniń aldyn alýǵa jáne ony azaıtýǵa baılanysty baǵdarlamalardy damytý men qoldaýǵa 6 mlrd dollar bólinetin bolsa, bul 2030 jylǵa deıingi barlyq kezeńde shyǵyndy 360 mlrd dollarǵa tómendetýge múmkin bolatynyn aıtty.