BUU bas hatshysy Qazaqstanǵa keledi

ASTANA. QazAqparat - 7 maýsymda BUU bas hatshysy Antonıý Gýterrısh Ortalyq Azııa elderine (Qazaqstan, Ózbekstan, Qyrǵyzstan, Tájikstan jáne Túrikmenstan) jumys saparmen barady. Bul týraly Nıý-Iorkte jýrnalısterge BUU basshysynyń resmı ókili Stefan Dıýjarrık aıtty, dep habarlady BUU Jańalyqtar ortalyǵy.

Antonıý Gýterrıshti barlyq 5 memlekette de el prezıdentteri qabyldaıdy, barlyq elde BUU bas hatshysy saltanatty sharalarǵa qatysady.

Qazaqstanda BUU bas hatshysy Shanhaı Yntymaqtastyq Uıymynyń sessııasynda, al Ózbekstanda ornyqty damý maqsattary boıynsha ulttyq forýmnyń ashylýynda sóz sóıleıdi.

Qyrǵyzstanda Gýterrısh Oshtaǵy 2010 jylǵy maýsym oqıǵasynyń jyldyǵyna arnalǵan sharaǵa qatysady; Tájikstanda - ornyqty damý máseleleri boıynsha konferentsııa; Túrikmenstanda - Ortalyq Azııadaǵy BUU Jahandyq kontrterrorıstik strategııany iske asyrý boıynsha joǵary deńgeıdegi Ortaazııalyq dıalogqa qatysady.