BUU Bas hatshysy: Kaspııdiń mártebesi týraly konventsııa - tarıhı qujat

ASTANA. QazAqparat - BUU Bas hatshysy Antonıý Gýterrısh Kaspıı teńiziniń mártebesi týraly qol qoıylǵan konventsııany tarıhı qujat dep atady. Bul týraly QazAqparat TASS agenttigine silteme jasap habarlaıdy.

Bas hatshy Ázerbaıjan, Iran, Qazaqstan, Reseı jáne Túrikmenstannyń Kaspıı teńiziniń mártebesi týraly konventsııaǵa qol qoıǵanyn quptady.

«Osy tarıhı qujat álemdik beıbitshilik pen qaýipsizdikti saqtaýǵa qajetti óńirlik yntymaqtastyqtyń mańyzdylyǵyn kórsetedi», - delingen málimdemede.

Gýterrıshtiń pikirinshe, konventsııa Kaspıı teńizi jaǵalaýynda ornalasqan elderdiń arasyndaǵy qordalanyp qalǵan kóptegen máselelerdi retteýdiń baǵa jetpes tetigi, sondaı-aq óńirdegi túıtkilderdi taratýǵa qoıylǵan aıtarlyqtaı batyl qadam bolmaq.

BUU basshysy bes eldi «óńirlik yntymaqtastyq pen kópjaqty kelissózderdiń tarıhı jetistigimen» quttyqtady.

Eske sala keteıik, Aqtaýda besinshi Kaspıı sammıti otyrysynyń qorytyndysy boıynsha, Qazaqstan, Reseı, Iran, Ázerbaıjan jáne Túrikmenstan prezıdentteri Kaspıı teńiziniń mártebesi týraly Konventsııaǵa qol qoıǵan bolatyn.