BUU Bas hatshysy bir táýlikke ashtyq jarııalady
ASTANA. Qarashanyń 14-i. QazAqparat - BUU Bas hatshysy Pan Gı Mýn asharshylyqtan zardap shegip otyrǵan 1 mıllıardtan astam adamnyń problemalaryna álem jurtshylyǵynyń nazaryn aýdarý úshin 24 saǵat boıy ashyǵý týraly sheshim qabyldady,
dep habarlaıdy «Azattyq» radıosy.
BUU ókiliniń habarlaýynsha, Pan Gı Mýn jeksenbi kúni, Rımge bara jatqan saparynda nár tatpaıtyn bolady. Al dúısenbi kúni ol Rımde ashylatyn asharshylyqpen kúres problemalaryna arnalǵan úshkúndik halyqaralyq konferentsııaǵa qatysady.
Rımdegi kezdesýdi ótkizip otyrǵan BUU-nyń Azyq-túliktik jáne aýyl sharýashylyǵy uıymynyń basshysy Jak Dıýf, Jerdiń barlyq turǵyndaryn BUU Bas hatshysyna qosylýǵa jáne Rım konferentsııasynyń qarsańyndaǵy kúni tamaqtan bas tartýǵa shaqyrdy.
