BUU Bas hatshysy Baǵdadtaǵy lańkestikti úzildi-kesildi aıyptady
ASTANA. Qazannyń 26-sy. QazAqparat - BUU Bas hatshysy Pan Gı Mýn, sońǵy málimetter boıynsha, 147 adam qurban bolǵan jáne 700-den astam adam jaraqat alǵan Iraktaǵy lańkestik áreketti úzildi-kesildi aıyptady.
Bul týraly jeksenbi kúni keshke BUU shtab-páterinde taratylǵan Bas hatshynyń resmı ókiliniń málimdemesinde aıtylyp otyr, dep habarlaıdy «RIA «Novostı» agenttigi.
Esterińizge sala keteıik, Baǵdadtyń ortalyǵynda jasalǵan eki jarylystyń saldarynan eń az degende 147 adam qaza bolyp, taǵy 721 adam jaralanǵan. Mına qoıylǵan avtokólik qazannyń 25-i kúni tańerteń Baǵdadtyń ákimshilik ortalyǵynda qatarynan jarylǵan bolatyn. Birinshi jarylys máskeý ýaqyty boıynsha saǵat 10.30-da Iraktyń Ádilet mınıstrliginiń qasynda bolsa, ekinshisi - Baǵdadtyń aımaqtyq ákimshiliginiń ǵımaratyna jaqyn jerde jarylǵan.
«Bas hatshy Iraktyń Ádilet mınıstrligi men Baǵdad ákimshiliginiń ǵımarattarynyń janynda bolǵan jáne júzdegen adamnyń ómirin qıǵan jáne jaralanǵan jarylystar týraly habardy qaıǵyryp qabyldady. Ol beıkúná adamdarǵa qarsy baǵyttalyp otyrǵan jáne qalpyna endi kele bastaǵan Iraktyń irgesin ydyratýdy maqsat etken osynaý zorlyq-zombylyq aktsııalaryn úzildi-kesildi aıyptap otyr», delingen málimdemede.
Pan Gı Mýn sondaı-aq, qaza tapqandardyń otbasylaryna kóńil aıtyp, jaralanǵandarǵa tezirek saýyǵyp ketýge tilek bildirdi. Ol sondaı-aq, barlyq ıraktyqtardy «osynaý jantúrshigerlik áreketterge qarsy birigýge» shaqyrdy jáne eldegi saıası progrestiń jetistikterin qorǵaý, atap aıtqanda 2010 jylǵy qańtardyń 15-ine josparlanǵan ulttyq saılaýda belsendilik tanytý baǵytyndaǵy jumystardy jalǵastyrýǵa úndedi.
