BUU Bas hatshysynyń Ortalyq Azııaǵa sapary 29 maýsymda bastalady
ASTANA. KAZINFORM —BUU Bas hatshysy Antonıý Gýterrısh Ortalyq Azııaǵa sapary aıasynda Qazaqstanǵa resmı saparmen keledi.
Senbi, 29 maýsym kúni BUU Bas hatshysy Ortalyq Azııaǵa saparyn bastaıdy, onyń alǵashqy aıaldamasy Ózbekstannyń Tashkent qalasy bolady. Ary qaraı Qyrǵyzstan, Qazaqstan, Tájikstan jáne Túrkimenstanǵa jol tartady.
«3-4 shilde kúnderi Almaty men Astanada bolyp, Qazaqstan Prezıdenti Qasym-Jomart Toqaevpen, basqa da joǵary laýazymdy tulǵalarmen jáne BUU qyzmetkerlerimen kezdesýler ótkizedi. Bas hatshy 4 shildede Astanada ótetin Shanhaı yntymaqtastyq uıymynyń sammıtine shaqyryldy. Ol „ShYU plıýs“ sessııasynda sóz sóıleıdi», — dep habarlady BUU keńsesi.
Bul Bas hatshynyń Qazaqstanǵa ekinshi resmı sapary. Alǵashqy resmı sapar 2017 jyly boldy.
Sondaı-aq onyń búgingi tereń jahandyq kelispeýshilikter klımattyń ózgerýi men tsıfrlyq tehnologııalardan týyndaıtyn eki úlken qaýip-qaterdi sheshý úshin elderdiń birigýine kedergi keltiretinin aıtady dep josparlanǵan.
— Qazaqstannyń BUU qaǵıdattary men maqsattaryna degen adaldyǵyn kórsetetin ekinshi resmı sapary kezinde BUU Bas hatshysyn Qazaqstanda qarsy alý biz úshin úlken mártebe. Táýelsizdik alǵan sátten bastap Qazaqstannyń BUU-men belsendi ózara is-qımyly onyń jahandyq beıbitshilikke, qaýipsizdikke jáne ornyqty damýǵa beıildiligin kórsetedi. Qazaqstan kópjaqty kózqarastyń senimdi jaqtaýshysy bolyp tabylady jáne BUU — men áriptestigin tereń baǵalaıdy, - dep atap ótti BUU-nyń Qazaqstandaǵy Turaqty úılestirýshisi Mıkaela Frıberg-Storı.
BUU bastamalary bilim berý men densaýlyq saqtaý salasyna qoljetimdilikti keńeıtýden bastap genderlik teńdikti ilgeriletýge, ekonomıkalyq múmkindikter men adam quqyqtaryn keńeıtýge deıingi máselelerdiń keń aýqymyn qamtıdy-barlyǵy ınklıýzıvti qoǵam qurýǵa baǵyttalǵan. 2023 jyly BUU-nyń Qazaqstanǵa seriktestermen birlesken qoldaýy 33,3 mln AQSh dollaryn qurady
