BUU Bas hatshysynyń Qazaqstanǵa saparynyń egjeı-tegjeıi belgili boldy
ASTANA. KAZINFORM — BUU Bas hatshysy Antonıý Gýterrıshtiń Ortalyq Azııa elderine sapary aıasynda 3 tamyzda Qazaqstanǵa saparynyń egjeı-tegjeıi belgili boldy, dep habarlaıdy BUU-nyń Qazaqstandaǵy ókildigi.
Almatyǵa sapary barysynda Bas hatshy Qazaqstan Respýblıkasynyń Prezıdenti Qasym-Jomart Toqaevpen kezdesip, sondaı-aq Úkimet ókilderi men BUU qyzmetkerleriniń qatysýymen ótetin birqatar is-sharaǵa qatysady.
Sapardyń basty oqıǵasy BUU men Qazaqstan Úkimeti arasyndaǵy BUU-nyń Ortalyq Azııa men Aýǵanstan úshin Ornyqty damý maqsattary boıynsha óńirlik ortalyǵyn (ODO) qurý týraly kelisimge qol qoıý bolmaq.
Qujatqa qol qoıatyn taraptar – Qazaqstan Respýblıkasynyń Premer-Mınıstriniń orynbasary – Syrtqy ister mınıstri Murat Nurtileý jáne BUU-nyń ekonomıkalyq jáne áleýmettik máseleler jónindegi Bas hatshysynyń orynbasary Lı Tszıýnhýa bolmaq.
Atalǵan ortalyq 2030 jylǵa deıingi Turaqty damý salasyndaǵy kún tártibin óńirlik deńgeıde ilgeriletý úshin mańyzdy alańǵa aınalady.
— Bul BUU Bas hatshysynyń Qazaqstanǵa úshinshi sapary, ol BUU men Qazaqstan Respýblıkasy arasyndaǵy serpindi yntymaqtastyqty, sondaı-aq eldiń aımaqtaǵy kópjaqtylyq pen turaqty damýdy ilgeriletýdegi kóshbasshy retinde ósip kele jatqan rólin tanytyp otyr. Bas hatshy óz sózinde halyqaralyq yntymaqtastyqty nyǵaıtýdyń, jahandyq syn-qaterlerge, sonyń ishinde klımattyń ózgerýine, tsıfrlyq transformatsııaǵa qarsy turý jáne beıbitshilikti qamtamasyz etýdiń mańyzdylyǵyn atap ótedi dep kútilip otyr, — dep atap ótti BUU ókildigi.
BUU Qazaqstandy ınklıýzıvti ekonomıkalyq ósý men turaqty ekologııalyq sheshimderden bastap adam quqyqtary, genderlik teńdik, densaýlyq saqtaý jáne bilim berý sııaqty keń aýqymdy salalarda qoldaıdy. 2024 jyly seriktestermen birlesip Qazaqstanǵa kórsetilgen qoldaý kólemi 37 mln AQSh dollary boldy.
Aıta ketelik Birikken Ulttar Uıymynyń Bas hatshysy Antonıý Gýterrısh Qazaqstanǵa saparmen keletini týraly jazǵan edik.