BUU Bas hatshysy uıymdaǵy bıýrokratııa men esepterdiń artyqtyǵyna alańdaýshylyq bildirdi

ASTANA. KAZINFORM — Birikken Ulttar Uıymynyń (BUU) Bas hatshysy Antonıý Gýterrısh «BUU-80» bastamasy aıasynda onyń jumys toby daıyndaǵan baıandama týraly uıymǵa múshe memleketterdiń ókilderine málimdedi, dep jazdy DW. 

Baıandamada BUU qyzmetkerleri Bas Assambleıa men Qaýipsizdik Keńesi sııaqty organdardan berilgen myńdaǵan mandatty qalaı oryndaıtynyna nazar aýdarylǵan.

— Keńester men esepterdiń tym kóptigi búkil júıeni — jáne bárimizdi — shekten tys júkteýge ákelip otyr, — dedi Gýterrısh.

Onyń aıtýynsha, byltyr BUU júıesi 240 organnyń qatysýymen 27 000 otyrys ótkizgen, al BUU hatshylyǵy 1100 esep daıyndaǵan. Bul — 1990 jylmen salystyrǵanda 20%-ǵa kóp, dep eske salady Reuters agenttigi.

Gýterrısh óz baıandamasynda kóptegen esepterdiń BUU-nyń resmı saıtynda jarııalanǵanyna qaramastan, keń qoldanylmaıtynyn aıtyp, qynjyldy.

— Bul esepterdiń kóbin kóp adam oqymaıdy, — dedi ol. — Tek 5% esep 5500 retten artyq júktelgen, al ár besinshi esep 1000 retten de az júktelgen. Al júkteý — oqyldy degendi bildirmeıdi.

Baıandama BUU jumys tobynyń baıandamasy negizinde daıyndalǵan jáne reformanyń birneshe baǵytynyń birin ǵana qamtıdy, dep atap ótti Bas hatshy.

«BUU-80» bastamasy

Bul bastamanyń maqsaty — BUU-nyń tıimdiligin arttyrý jáne «senimsizdik artyp, kómekke muqtaj adamdar sany kóbeıip jatqan kezeńde kópjaqty yntymaqtastyqtyń qundylyǵyn rastaý», — dedi Antonıý Gýterrısh.

Bastama uıymnyń jańa syn-tegeýrinderge — áskerı qaqtyǵystardan bastap kóshi-qonǵa, klımattyq apattar men tehnologııalyq ózgeristerge deıin — jaýap berý qabiletin kúsheıtýdi kózdeıdi. Sonymen qatar ol bıýdjetti qysqartý men saıası kelispeýshilikterdiń artýy sııaqty syrtqy qysymdarmen kúresýdi maqsat etedi.

«BUU-80» bastamasy úsh negizgi baǵytqa negizdelgen:

1. Іshki tıimdilikti arttyrý, sonyń ishinde bıýrokratııany qysqartý;

2. Mandattardy qaıta qaraý, qajetsiz jáne eskirgenderin alyp tastaý;

3. Qurylymdyq ózgerister, BUU júıesiniń arhıtektýrasyn taldaý jáne qajet bolsa ózgerister engizý.

Gýterrısh «BUU-80» jumys tobyn bıyl naýryz aıynda qurǵan. BUU-nyń 80 jyldyq mereıtoıy qarsańynda uıym jetinshi jyl qatarynan qarjylyq tapshylyq daǵdarysyna tap bolyp otyr, óıtkeni 193 múshe eldiń barlyǵy mindetti jarnalaryn tolyq nemese ýaqytynda tólemeıdi, dep naqtylaıdy Reuters.

Eske sala keteıik, 3 tamyz kúni Prezıdent Qasym-Jomart Toqaevtyń shaqyrýymen Birikken Ulttar Uıymynyń Bas hatshysy Antonıý Gýterrısh Qazaqstan Respýblıkasyna saparmen keledi.