BUU Bas hatshysy Tramptyń Gazadaǵy qaqtyǵysty retteý josparyn qoldady

ASTANA. KAZINFORM – BUU Bas hatshysy Antonıý Gýterrısh AQSh prezıdenti Donald Tramptyń Gaza sektoryndaǵy qaqtyǵysty beıbit jolmen retteý josparyn qoldap, ony oryndaýǵa shaqyrdy, dep habarlaıdy Izvestııa.

«BUU Palestına, Izraıl jáne búkil aımaq halyqtary úshin beıbitshilik, turaqtylyq jáne jarqyn bolashaqqa yqpal etetin kez kelgen kúsh-jigerdi qoldaýda berik ustanymda», – dep jazdy Bas hatshy áleýmettik jeli X paraqshasynda.

Gýterrısh sondaı-aq arab jáne musylman memleketteriniń beıbitshilikke qol jetkizý men atysty toqtatýdaǵy mańyzdy rólin erekshe atap ótti.

«Barlyq taraptar kelisim boıynsha mindettemelerdi alyp, ony oryndaýy asa mańyzdy», – dedi ol.

Eske salsaq, Aq úı 29 qyrkúıekte usynǵan qujat 20 tarmaqtan turady. Onda Izraıl áskerlerin Gazadan shyǵarý jáne áskerı qımyldardy toqtatý esesine kepilge alynǵan adamdardy bosatý kózdelgen. Kelisim bekitilgen soń sharttardy oryndaýǵa 72 saǵat beriledi.

Egıpet, Iordanııa, Indonezııa, Katar, Birikken Arab Ámirlikteri, Pákistan, Saýd Arabııasy jáne Túrkııa birlesken málimdeme jasap, AQSh-tyń beıbit josparyna qoldaý bildirdi.

Qazaqstan da AQSh Prezıdenti Donald Tramptyń Gaza sektoryndaǵy qaqtyǵysty toqtatýǵa arnalǵan jan-jaqty bitimgerlik josparyn qoldaıtynyn jetkizdi.