BUU Bas hatshysy Sırııadaǵy meshitke jasalǵan terrorıstik shabýyldy aıyptady

ASTANA.KAZINFORM — BUU Bas hatshysy Antonıý Gýterrısh Sırııanyń Homs provıntsııasynda juma namazy kezinde meshitte jasalǵan terrorıstik shabýyldy qatań aıyptady, dep habarlaıdy BUU Jańalyqtary. 

Bul týraly BUU Bas hatshysynyń baspasóz hatshysy Stefan Dıýjarrık taratqan habarlamada aıtylǵan.

Habarlamaǵa sáıkes, Antonıý Gýterrısh beıbit turǵyndar men dinı ǵımarattarǵa shabýyl jasaýǵa múlde jol berilmeıtinin atap ótip, kinálilerdi anyqtap, olardy jaýapkershilikke tartýǵa shaqyrdy.

Sondaı-aq habarlamada Sırııa bıliginiń bul shabýyldy aıyptaǵany jáne terrorızmge qarsy kúresti jalǵastyrýǵa beıildi ekenin qaıta rastaǵany kórsetilgen.

— Bas hatshy qaza tapqandardyń otbasylaryna kóńil aıtyp, jaralanǵandardyń tezirek saýyǵyp ketýin tileıdi», — delingen málimdemede.

Sırııanyń ortalyq bóliginde ornalasqan Homs provıntsııasyndaǵy meshitte juma namazy kezinde bolǵan jarylys saldarynan 8 adam qaza taýyp, taǵy 18 adam jaraqat alǵan.

Sırııa prezıdentiniń BAQ-pen baılanys jónindegi keńesshisi Ahmed Mývaffak Zeıdan oqıǵaǵa pikir bildirip, «turaqsyzdyqqa alańdaıtyndar haos kezeńiniń aıaqtalǵanyn túsinýi kerek» dep málimdedi.

Qazirgi ýaqytta bul shabýyl úshin jaýapkershilikti eshbir top óz moınyna alǵan joq.