BUU Bas hatshysy Reseı men Ýkraınanyń Qara teńizge qatysty kelisimderin quptaıdy
ASTANA. KAZINFORM – Antonıo Gýterrısh Saýd Arabııasyndaǵy sarapshylar kezdesýinen keıin málimdeme jasady. Bul týraly Anadoly saıty jazdy.
Birikken Ulttar Uıymynyń Bas hatshysy Antonıý Gýterrısh Reseı men Ýkraına arasyndaǵy Qara teńizde keme qatynasy erkindigi týraly kelisimge qanaǵattanǵanyn aıtty.
— Bas hatshy Amerıka Qurama Shtattary, Reseı Federatsııasy jáne Ýkraınanyń Saýd Arabııasynda qol jetkizgen kelissózderi men mindettemelerin quptaıdy, — dedi BUU basshysy uıymnyń baspasóz qyzmeti taratqan málimdemede.
Aımaqtan jahandyq naryqtarǵa shyǵatyn saýda joldarynyń mańyzdylyǵyn eske saldy.
— Azamattyq kemeler men port ınfraqurylymyn qorǵaýdy qamtamasyz etý úshin Qara teńizde júzý erkindigi týraly kelisimge qol jetkizý jahandyq azyq-túlik qaýipsizdigi men jetkizý tizbegine mańyzdy úles bolady, — dedi Gýterrısh.
Uıym basshysy BUU-nyń bul máselemen uzaq ýaqyt aınalysyp kele jatqanyn jáne 2024 jyldyń 7 aqpanynda Túrkııa prezıdenti Rejep Taıyp Erdoǵanǵa, Reseı prezıdenti Vladımır Pýtınge jáne Ýkraına prezıdenti Vladımır Zelenskııge Qara teńizde qaýipsiz jáne erkin júzý týraly usynyspen hat joldaǵanyn eske saldy.
Birikken Ulttar Uıymy osy baǵytta júıeli jumysyn jalǵastyryp otyr, delingen málimdemede.
BUU sondaı-aq azyq-túlik qaýipsizdiginiń jahandyq máselelerin sheshý úshin reseılik azyq-túlik ónimderi men tyńaıtqyshtarynyń álemdik naryqtarǵa shyǵýyn jeńildetý maqsatynda Reseı Federatsııasymen ózara túsinistik týraly memorandýmdy odan ári iske asyrýǵa qatysýdy jalǵastyra bermek.
— Bas hatshynyń izgi qyzmetteri beıbitshilikke qol jetkizýge baǵyttalǵan barlyq kúsh-jigerdi qoldaýǵa daıyn, — delingen habarlamada.
BUU basshysy mundaı kúsh-jigerdiń atysty toqtatýǵa jol ashyp, BUU jarǵysyna, halyqaralyq quqyqqa jáne «Ýkraınanyń táýelsizdigi, egemendigi men aýmaqtyq tutastyǵyna tolyq qurmetpen» sáıkes qararlaryna «ádil, jan-jaqty jáne uzaq beıbitshilikke qol jetkizýge yqpal etetinine» úmitti ekenin aıtty.
Eske sala keteıik, buǵan deıin BUU basshysy áıelderdiń quqyqtaryn qorǵaý úshin áreket etýge shaqyrdy.