BUU Bas hatshysy Kıprge saparynan keıin kelissózderdiń jańa kezeńi bastalatynyn málimdedi
ASTANA. KAZINFORM — BUU Bas hatshysy Antonıý Gýterrısh Kıprge jasaǵan alǵashqy saparynyń qorytyndysy boıynsha araldaǵy jaǵdaıdy retteý jóninde jańa kezdesý ótkizýdi josparlap otyrǵanyn málimdedi. Oǵan Kıprdiń eki qaýymdastyǵynyń kóshbasshysy, kepilger elderdiń jáne uıymnyń ókilderi qatysady, dep habarlaıdy BUU jańalyqtary.
BUU Bas hatshysy Nıkosııada jýrnalısterge bergen suhbatynda sońǵy jyldary kelissózder Jeneva, Kran-Montana, Berlın jáne Nıý-Iork qalalarynda ótkenin eske saldy.
— Osy jaǵdaıǵa baılanysty Kıprge kelip, aral halqynyń máseleni sheshýge degen umtylysyn tolyq qoldaıtynymdy bildirý meniń mindetim boldy, — dedi ol.
Senimdi qalpyna keltirý qajet
Gýterrıshtiń aıtýynsha, qazir taraptar arasyndaǵy senimdi qalpyna keltirý úshin bar kúshti salatyn ýaqyt keldi. Ol aral turǵyndarynyń kúndelikti ómirin jaqsartýǵa múmkindik beretin senim sharalaryn ázirlep, júzege asyrýdyń mańyzdylyǵyn atap ótti. Sondaı-aq eki kóshbasshyny osy baǵyttaǵy jumysty jandandyrýǵa shaqyrdy.
BUU Bas hatshysy óziniń jeke ókili Marııa Anhela Olgınniń taraptarmen baılanysyn jalǵastyryp jatqanyn aıtty. Ol buǵan deıingi BUU bastamalaryna jáne Kıpr turǵyndarymen tikeleı baılanysqa súıenip jumys júrgizip keledi.
Sapar barysynda Bas hatshy araldaǵy túrli qaýymdastyqtardyń ókilderimen de kezdesti.
— Olardyń aıtar sózi anyq. Olar ilgerileýdi qalaıdy. Kóshbasshylarynyń ymyraǵa kelýge jáne Kıpr máselesin retteý jolyndaǵy sońǵy kezeńnen ótýge daıyn ekenin kórgisi keledi. Olar araldyń bólinýmen emes, yntymaqtastyqpen, múmkindiktermen jáne beıbitshilikpen aıqyndalatyn bolashaǵyn qalaıdy, — dedi ol.
Gýterrıshtiń aıtýynsha, eki kóshbasshymen jeke-jeke jáne birge ótkizgen «ashyq ári syndarly» kezdesýler barysynda da dál osyndaı kóńil kúı baıqalǵan. BUU basshysy túrik kıprlikteriniń kóshbasshysy Týfan Erhıýrman men grek kıprlikteriniń kóshbasshysy Nıkos Hrıstodýlıdıstiń óziniń jeke ókilimen jumysty jalǵastyrýǵa daıyn ekenin rastaǵanyn habarlady.
5+1 formatyndaǵy jańa kezdesý
Ótken kelissózderdiń qorytyndysy boıynsha Bas hatshy 5+1 formatynda jańa kezdesý ótkizýdi uıǵardy. Oǵan grek kıprlikteri men túrik kıprlikteri qaýymdastyqtarynyń ókilderi, úsh kepilger el — Grekııa, Túrkııa jáne Ulybrıtanııa, sondaı-aq BUU qatysady.
Alaıda Gýterrısh kelissózder muqııat daıyndyqtan keıin ǵana ótetinin atap ótti.
— Men nátıjesiz 5+1 formatyndaǵy jańa kezdesýler ótkizgim kelmeıdi. Kezdesý sátti ótip, máseleni retteýge jol ashqanyn qalaımyn, — dedi ol jýrnalısterdiń suraǵyna jaýap bere otyryp.
BUU Bas hatshysynyń aıtýynsha, kezdesýdiń naqty merzimi ázirge belgilengen joq.
BUU men halyqaralyq qaýymdastyqtyń róli
Bas hatshy Kıprdegi BUU-nyń bitimgerlik kúshteriniń mandatyn býferlik aımaqta da, BUU belgilegen atysty toqtatý jelileriniń keıbir ýchaskelerinde de qurmetteýdiń qajettigin atap ótti.
Onyń aıtýynsha, 6 onjyldyqtan astam ýaqyt boıy bitimgerlik mıssııa tynyshtyq pen turaqtylyqty saqtaýǵa kómektesip keledi. Onyń tıimdiligi barlyq taraptardyń yntymaqtastyǵyna baılanysty.
Bas hatshy sondaı-aq eki taraptaǵy habar-osharsyz ketken adamdardyń otbasylaryna kómektesetin Habar-osharsyz ketkender jónindegi komıtettiń jumysyn joǵary baǵalady. Sonymen qatar eki qaýymdastyq ókilderiniń máselelerin sheshýge baǵyttalǵan praktıkalyq jumystarmen aınalysatyn tehnıkalyq komıtetterdiń qyzmetin atap ótti.
Ol halyqaralyq qaýymdastyq Kıpr máselesin retteý úderisin ári qaraı da qoldaýy qajet ekenin aıtty.
Aıta keteıik, Astanada Kıpr Respýblıkasynyń elshiligi ashyldy.
