BUU Bas hatshysy Izraıldiń Sırııadaǵy áýe shabýylyn aıyptady

ASTANA. KAZINFORM — BUU Bas hatshysy Antonıý Gýterrısh Izraıldiń Sırııadaǵy Sýveıda, Daraa qalalary men astana Damaskke jasaǵan soqqylaryn qatań aıyptady. Bul týraly Anadolu jazdy.

BUU Bas hatshysynyń resmı ókili Stefan Dıýjarrık kúndelikti baspasóz máslıhatynda Taıaý Shyǵystaǵy jaǵdaıǵa baılanysty jýrnalıster suraqtaryna jaýap berip, Gýterrıshtiń jazbasha málimdemesin oqyp berdi.

— Bas hatshy (Gýterrısh) Izraıldiń Sýveıda, Daraa jáne Sırııa astanasy Damasktiń ortalyǵyna jasaǵan áýe shabýyldarynyń kúsheıýin aıyptaıdy, — dedi Dıýjarrık.

Ol Izraıl armııasynyń Golan jotalaryna qaıta ornalasqany jónindegi habarlamalarǵa silteme jasaı otyryp, BUU basshysynyń bul oqıǵalarǵa jaýap qaıtarǵanyn aıtty.

— Bas hatshy beıbit turǵyndarǵa qarsy kez kelgen zorlyq-zombylyqty, sonyń ishinde erikti óltirýler men dinaralyq shıelenisti kúsheıtetin, sırııalyqtardyń beıbitshilik pen tatýlasýǵa degen úmitin joıyp jatqan áreketterdi qatań aıyptaıdy, — dedi baspasóz hatshysy.

Sırııadaǵy qaqtyǵystyń 14 jyldan beri jalǵasyp kele jatqanyn eske salǵan Dıýjarrık Bas hatshynyń sırııalyqtarǵa shynaıy kóńil aıtyp, eldegi zorlyq-zombylyqty dereý toqtatýǵa shaqyrǵanyn jetkizdi.

Aıta keteıik, buǵan deıin Izraıl Damaskidegi Prezıdent saraıyna áýe soqqysyn jasaǵanyn jazdyq.