BUU Bas hatshysy Izraıldiń Lıvan aýmaǵyna jasaǵan soqqylaryn aıyptady

ASTANA. KAZINFORM - BUU Bas hatshysy Antonıý Gýterrısh sársenbi kúni Izraıldiń sol kúni Lıvan aýmaǵyna jasaǵan jappaı soqqylaryn qatań aıyptady. Bul týraly onyń resmı ókili Stefan Dıýjarrık málimdedi, dep habarlaıdy Sınhýa.

- Bas hatshy beıbit turǵyndardyń qaza tabýyn qatań aıyptaıdy jáne azamattyq halyq arasyndaǵy qurbandar sanynyń artýyna qatty alańdaýly», – dedi Stefan Dıýjarrık.

Qolda bar málimetterge sáıkes, soqqylar saldarynan júzdegen beıbit turǵyn qaza tapqan nemese jaralanǵan, olardyń arasynda balalar da bar.

Onyń aıtýynsha, Lıvanda bolyp jatqan áskerı áreketter AQSh pen Iran arasyndaǵy atysty toqtatý rejımine jáne óńirde uzaq merzimdi ári jan-jaqty beıbitshilik ornatý baǵytyndaǵy kúsh-jigerge eleýli qaýip tóndiredi.

-Bas hatshy barlyq tarapty urys qımyldaryn dereý toqtatýǵa taǵy da shaqyrady, – dedi ol.

Sonymen qatar halyqaralyq quqyqtyń qatań saqtalýy qajettigin atap ótip, beıbit turǵyndar men azamattyq nysandar árdaıym qorǵalýǵa tıis ekenin, olarǵa jasalǵan kez kelgen shabýylǵa jol berilmeıtinin jetkizdi.

Qaqtyǵystyń áskerı sheshimi joq ekenin atap ótken Stefan Dıýjarrık Antonıý Gýterrıshtiń barlyq tarapty dıplomatııalyq arnalardy paıdalanýǵa jáne Qaýipsizdik keńesiniń 1701-qararyn tolyq oryndaý jónindegi mindettemelerin qaıta jańǵyrtýǵa shaqyryp otyrǵanyn aıtty.

Osyǵan deıin Iran Izraıldiń Lıvanǵa jasaǵan soqqylarynan soń Ormýz buǵazyn qaıta japqan bolatyn.

AQSh vıtse-prezıdenti Djeı Dı Vens Irannyń keri málimdemelerine qaramastan, AQSh Lıvannyń atysty toqtatý kelisimine qosylatynyna eshqashan ýáde bermegenin málimdedi.