BUU bas hatshysy Gvıneıa-Bısaýdaǵy áskerı tóńkeristi aıyptady

ASTANA. KAZINFORM — Antonıý Gýterrısh barlyq tarapty barynsha sabyr saqtaýǵa shaqyrdy. Bul týraly BUU jańalyqtary habarlady. 

BUU Bas hatshysy Antonıý Gýterrısh Gvıneıa-Bısaýdaǵy jaǵdaıdyń ýshyǵýyna alańdaýshylyq bildirdi. Ol áskerı top jasaǵan memlekettik tóńkeristi jáne eldegi konstıtýtsııalyq tártipti buzýǵa baǵyttalǵan kez kelgen áreketti qatań aıyptady.

BUU basshysynyń baspasóz qyzmeti taratqan málimdemede 23 qarashada ótken jalpyulttyq saılaýda halyqtyń tynysh túrde bildirgen erkin elemeý «demokratııalyq úderisti óreskel aıaqqa basý» ekeni atap ótildi. Gýterrısh konstıtýtsııalyq tártipti dereý jáne shartsyz qalpyna keltirýge, sondaı-aq ustalǵan barlyq laýazymdy tulǵany, sonyń ishinde saılaý uıymdastyrýshylaryn, oppozıtsııa jetekshilerin jáne ózge de saıası qaıratkerlerdi bosatýǵa shaqyrdy.

Bas hatshy barynsha sabyr saqtap, zań ústemdigin qamtamasyz etý jáne adam quqyqtary salasyndaǵy halyqaralyq normalardy saqtaı otyryp, halyqtyń erkine qurmetpen qaraý qajettigin atap ótti.

Onyń aıtýynsha, barlyq kelispeýshilik zań arqyly jáne beıbit dıalog jolymen sheshilýi tıis.

Antonıý Gýterrısh Batys Afrıka memleketteri ekonomıkalyq qoǵamdastyǵynyń, Afrıka odaǵynyń jáne Batys Afrıka aqsaqaldar forýmynyń demokratııany qorǵaýǵa, turaqtylyqty nyǵaıtýǵa, saılaý úderisin beıbit aıaqtaýǵa jáne Gvıneıa-Bısaýdy múmkindiginshe tez arada demokratııalyq jolǵa qaıtarýǵa baǵyttalǵan kúsh-jigerine BUU-nyń tolyq qoldaý kórsetetinin rastady.

Aıta ketelik Gvıneıa-Bısaýda ásker bılikti óz baqylaýyna alǵanyn málimdegen edi. Sonymen qatar Gvıneıa-Bısaýda áskerı tóńkeristen keıin ýaqytsha prezıdent taǵaıyndaldy.