BUU Bas hatshysy Gýterrısh Izraıldi Sırııanyń egemendigi men aýmaqtyq tutastyǵyn qurmetteýge shaqyrdy
ASTANA. KAZINFORM — BUU basshysy Izraıldiń 1974 jylǵy kúshterdi ajyratý týraly kelisimdi buzǵanyn synǵa alyp, mundaı áreketterdi toqtatýdy talap etti. Bul týraly Anadoly jazdy.
Birikken Ulttar Uıymynyń Bas hatshysy Antonıý Gýterrısh Izraıl tarapynan jasalǵan buzýshylyqtardy aıyptap, Sırııanyń egemendigin jáne aýmaqtyq tutastyǵyn tolyq qurmetteý qajettigin atap ótti.
Gýterrısh bul týraly amerıkalyq kompanııaǵa tıesili X áleýmettik jelisinde málimdeme jarııalady.
BUU Bas hatshysy Izraıldiń 1974 jylǵy kúshterdi ajyratý týraly kelisimdi buzýyn qabyldaýǵa bolmaıtynyn aıtyp, mundaı áreketterdi toqtatýǵa shaqyrdy.
— Sırııanyń egemendigi, táýelsizdigi, birligi jáne aýmaqtyq tutastyǵy tolyqtaı qurmettelýi qajet, — dedi Gýterrısh.
Buǵan deıin Bashar Asad rejımi qulaǵannan keıin Izraıl áskeri 1974 jyly jasalǵan «Kúshterdi ajyratý týraly kelisimdi» buzyp, Sırııanyń ońtústigindegi Izraıl baqylaýyna ótken Deraa jáne Kýneıtra provıntsııalarynda 10-nan astam áskerı baza men nysan salǵany habarlanǵan bolatyn.
Eske sala keteıik, buǵan deıin BUU basshysy Iran men AQSh-ty kelissózdi shuǵyl qaıta bastaýǵa shaqyrǵan bolatyn.
BUU Bas hatshysy Asad rejımi qulaǵannan keıin alǵash ret Sırııaǵa bardy.
