BUU Bas hatshysy Gazadaǵy atysty toqtatý sammıtine qatysady

ASTANA. KAZINFORM — BUU Bas hatshysy Antonıý Gýterrısh Gaza sektorynda atysty toqtatý kelisimine qol qoıýǵa arnalǵan «Beıbitshilik sammıtine» qatysady. Kezdesý 13 qazanda Mysyrdyń Sharm-el-Sheıh qalasynda ótedi, dep habarlaıdy TASS.

— Bas hatshy dúısenbi kúni Sharm-el-Sheıhte ótetin Beıbitshilik sammıtine qatysý úshin Mysyrǵa barady, — delingen álemdik uıym basshysynyń baspasóz qyzmeti taratqan habarlamada.

Buǵan deıin Mysyr prezıdenti Ábdel Fattah as-Sısı keńsesi sammıtke qatysýǵa 20-dan astam eldiń basshylary shaqyrylǵanyn habarlady.

10 qazanda Izraıl áskerıleri Gazadaǵy atysty toqtatý kelisimi Máskeý ýaqytymen saǵat 12:00–de kúshine engenin jáne áskerlerdiń «jańartylǵan ornalastyrý syzyǵy boıynsha pozıtsııalaryn alǵanyn» habarlady. 

Aıta keteıik, osyǵan deıin BUU Bas hatshysy Izraıl men HAMAS arasyndaǵy beıbit kelisimdi qoldaıtyny týraly jazǵanbyz.