BUU Bas hatshysy: áıelder quqyǵy úshin kúreske qarsylyq kúsheıip keledi

ASTANA. KAZINFORM — Birikken Ulttar Uıymynyń Bas hatshysy Antonıý Gýterrısh azamattyq qoǵam ókilderin áıelder men qyzdardyń quqyqtary úshin kúresti jalǵastyrýǵa shaqyryp, álemniń kóptegen elinde genderlik teńdikke qarsy qarsylyq kúsheıip kele jatqanyn eskertti. 

BUU Jańalyqtarynyń málimetinshe, bas hatshy Nıý-Iorktegi Birikken Ulttar Uıymy shtab-páterinde áıelderdiń jaǵdaıy jónindegi komıssııanyń 70-sessııasy aıasynda quqyq qorǵaýshy áıeldermen kezdesý barysynda sóz sóıledi. Ol olardyń jahandyq qozǵalystyń «aldyńǵy shebinde» atqaryp jatqan eńbegine alǵys bildirdi.

— Sizder kún saıyn áıelder men qyzdardyń quqyqtaryn qorǵap, jańa múmkindikter ashyp, qoǵamda alaýyzdyq baıqalyp turǵan kezeńde yntymaqtastyq ornatyp júrsizder, — dedi ol.

Gýterrıshtiń aıtýynsha, bul jumys kóbine qaýip-qatermen, qorqytý jáne qýdalaýmen qatar júredi.

— Ózgerister úshin kúresken kezde sizder patrıarhatqa qarsy shyǵasyzdar. Al patrıarhat buǵan qarsylyq kórsetedi, — dep atap ótti Bas hatshy.

Ol álem áli de «erler ústemdik etetin mádenıet qalyptasqan álem» bolyp otyrǵanyn aıtty.

Onyń sózinshe, genderlik teńdik máselesi saıasat, ekonomıka jáne bolashaqty qalyptastyratyn tehnologııa salalaryndaǵy bılikpen tyǵyz baılanysty.

Bas hatshy sońǵy on jylda Birikken Ulttar Uıymy júıesinde genderlik teńgerimdi qamtamasyz etý baǵytynda aıtarlyqtaı nátıjege qol jetkizilgenin aıtty. Tarıhta alǵash ret uıymnyń joǵary basshylyǵy arasynda tolyq genderlik teńdik ornatyldy. Bul ári shtab-páterde, ári álemdegi ókildikter basshylary arasynda júzege asty.

Eger on jyl buryn shamamen 160 joǵary laýazymdy tulǵanyń tek 30 paıyzy ǵana áıelder bolsa, búginde tolyq genderlik teńgerimge qol jetkizilgen. Gýterrısh bul úshin kadr irikteý erejelerin ózgertý qajet bolmaǵanyn atap ótti.

— Genderlik teńdikke jetý úshin erejelerdi ózgertý mindetti emes. Tek áıelderge erlermen birdeı múmkindik berý kerek, — dedi ol.

Sonymen birge Bas hatshy áıelder quqyqtaryna qarsy jahandyq qarsylyqtyń kúsheıip kele jatqanyn eskertti. Onyń aıtýynsha, bul úrdis jalǵan aqparat, qorqynysh jáne «mádenı soǵys» dep atalatyn qubylys arqyly órship otyr.

Soǵan qaramastan, áıelder adam quqyqtaryn qorǵaýda mańyzdy ról atqaryp keledi. Bul densaýlyq saqtaý, klımat máseleleri, beıbitshilik ornatý jáne eńbek quqyqtaryn qorǵaý salalaryn qamtıdy.

Gýterrısh belsendilerdi óz jumysyn jalǵastyrýǵa shaqyryp, qol jetkizilgen jetistikterdiń áli de osal ekenin aıtty.

Kezdesý sońynda Bas hatshy qatysýshylarǵa qoldaý bildirdi.

— Artqa sheginý bolmaıdy, qol jetkizilgen jetistikterden bas tartý bolmaıdy. Biz eshqashan berilmeımiz, — dedi ol. 

Aıta ketelik genderlik teńdik: jahandyq úrdister men Qazaqstandaǵy jaǵdaı týraly jazǵan edik.