BUU Bas hatshysy Asad rejımi qulaǵannan keıin alǵash ret Sırııaǵa bardy
ASTANA. KAZINFORM — BUU Bas hatshysy Antonıý Gýterrısh Asad rejımi qulaǵannan keıingi Sırııaǵa jasaǵan alǵashqy sapary barysynda eldiń qaqtyǵystan keıin qalpyna kelip qana qoımaı, turaqty, ınklıýzıvti ári órkendegen memleket qurýǵa múmkindigi bar ekenin málimdedi, dep habarlaıdy BUU Jańalyqtary.
Damaskide Sırııanyń Syrtqy ister mınıstri Asaad ash-Shıbanımen birge ótken baspasóz máslıhatynda Gýterrısh bul saparyn «asa mańyzdy» dep atady. Ol BUU-nyń Bosqyndar isi jónindegi burynǵy Joǵarǵy komıssary ári keıin Bas hatshy retinde sırııalyqtarmen uzaq jyl boıy jumys istegenin eske aldy.
Gýterrıshtiń aıtýynsha, ol 2011 jyly Sırııada halyqqa qarsy qatań qýǵyn-súrgin bastalǵannan bastap Asad rejımi qulaǵanǵa deıin bul elge ádeıi kelmegen.
Bas hatshy sırııalyqtardyń uzaq jyldar boıy qıyndyq, qaıǵy men belgisizdikti bastan ótkergenine qaramastan, olardyń tózimdiligi men áleýetin saqtap qalǵanyn atap ótti.
— Búginde Sırııa jańa múmkindikterdiń aldynda tur. Bul tek soǵystyń zardaptaryn eńserýge ǵana emes, turaqty, ınklıýzıvti jáne gúldengen bolashaqtyń negizin qalaýǵa berilgen múmkindik, — dedi ol.
Gýterrısh eldi qalpyna keltirý úshin árbir sırııalyq ózin memleket bolashaǵynyń bir bólshegi retinde sezinýi qajet ekenin aıtty. Onyń sózinshe, Sırııanyń keleshegin sırııalyqtardyń ózderi aıqyndap, bolashaq urpaqqa qyzmet etetin memlekettik ınstıtýttardy qalyptastyrýy tıis.
Sonymen qatar BUU Bas hatshysy on jyldan astam ýaqytqa sozylǵan qaqtyǵystan keıin Sırııanyń halyqaralyq qoldaýsyz qaıta qalpyna kele almaıtynyn málimdedi.
— Qazir halyqaralyq qaýymdastyq Sırııany qoldaıtyn ýaqyt keldi. Eldi qalpyna keltirý — gýmanıtarlyq mindet qana emes, beıbitshilikke, damýǵa jáne óńirlik turaqtylyqqa salynatyn ınvestıtsııa, — dedi ol.
Ol halyqaralyq qarjy ınstıtýttary men damý jónindegi seriktesterdi Sırııa ekonomıkasy men ınfraqurylymyn qalpyna keltirýge, negizgi qyzmetterdiń jumysyn jandandyrýǵa, jumys oryndaryn kóbeıtýge jáne bosqyndardyń oralýyna qoldaý kórsetýge shaqyrdy.
Gýterrısh sondaı-aq BUU Sırııanyń egemendigin, táýelsizdigin jáne aýmaqtyq tutastyǵyn tolyq qoldaıtynyn atap ótti.
— Sırııanyń egemendigi men aýmaqtyq tutastyǵyn buzý — jol berýge bolmaıtyn áreket jáne ol toqtatylýy tıis, — dedi ol.
Golan jotalaryna qatysty pikir bildirgen Bas hatshy bul aýmaqtyń Sırııa jeri ekenin eske salyp, óńirdegi qazirgi jaǵdaıdyń qabyldaýǵa bolmaıtynyn aıtty.
Sapar barysynda Antonıý Gýterrısh Sırııa prezıdenti Ahmed ash-Sharaamen, joǵary laýazymdy tulǵalarmen, BUU-nyń Golan jotalaryndaǵy Baqylaý kúshteri ókilderimen, sondaı-aq áıelder uıymdary jáne azamattyq qoǵam ókilderimen kezdesedi dep josparlanǵan.
Dúısenbi kúni ol Sırııa Arab Respýblıkasynyń jańa Halyq jınalysynda sóz sóılep, keıin Kıprge attanady.
Aıta ketelik Makron bılik aýysqannan beri Sırııaǵa barǵan EO-daǵy alǵashqy memleket basshysy bolǵan edi.
