BUU Bas hatshysy AQSh, Izraıl jáne Irandy qaqtyǵysty toqtatýǵa shaqyrdy
ASTANA. KAZINFORM – BUU Bas hatshysy Antonıý Gýterrısh Taıaý Shyǵystaǵy jaǵdaıǵa qatysty «Bul soǵys baqylaýdan shyǵyp ketti» dep málimdedi. Ol bul pikirin Nıý-Iorktegi BUU shtab-páterinde jýrnalıster aldynda aıtty. Bul týraly News.un.org jazdy.
Onyń aıtýynsha, ol «aımaqtyń jáne búkil álemniń kóptegen ókilderimen» tyǵyz baılanysta jumys istep otyr.
– Qazirgi ýaqytta dıalog pen beıbitshilikke baǵyttalǵan birqatar bastamalar júzege asyrylyp jatyr. Olar nátıjeli bolýy tıis. Men jýyrda Jan Arnony BUU-nyń qaqtyǵysty jáne onyń saldaryn retteý jónindegi kúsh-jigerin úılestirý úshin jeke ókilim etip taǵaıyndadym, – dedi Gýterrısh.
Ol qaqtyǵystyń ýshyǵýyn toqtatyp, dıplomatııalyq kelissózderdi bastaý ýaqyty kelgenin atap ótti.
– Meniń AQSh pen Izraılge aıtarym – soǵysty toqtatatyn ýaqyt keldi. Al Iranǵa joldaýym – kórshilerińizge shabýyl jasaýdy toqtatyńyzdar, – dedi BUU basshysy.
Sondaı-aq Gýterrısh Ormýz buǵazynda keme qatynasy erkindigin saqtaý qajettigin aıtty. Onyń paıymdaýynsha, bul buǵazdyń uzaq ýaqytqa jabylýy jahandyq egis naýqany bastalǵan mańyzdy kezeńde munaı, gaz jáne tyńaıtqysh jetkizilimderin toqyraýǵa ushyratady.
Daǵdarystyń saldaryn tek aımaq turǵyndary ǵana emes, odan tys jerdegi halyq ta sezinip otyr.
– Men bul saldardyń bir bóligin Lıvanǵa jasaǵan sońǵy saparym kezinde óz kózimmen kórdim. Ol jaqta da soǵys toqtaýy tıis. «Hezbolla» Izraılge soqqy jasaýdy doǵarýy kerek. Al Izraıl Lıvanǵa qarsy áskerı operatsııalary men soqqylaryn toqtatýy tıis, óıtkeni eń kóp zardap shegetin – beıbit turǵyndar, – dedi ol.
Gýterrıshtiń aıtýynsha, BUU soǵystyń saldaryn azaıtý úshin bar kúshin salyp jatyr, alaıda qazirgi tańda gýmanıtarlyq operatsııalardy júrgizý qıynǵa soǵyp otyr.
– Bizge bul apattan shyǵýdyń joly qajet. Endigi sheshim dıplomatııada. Sheshim – halyqaralyq quqyqty tolyq saqtap otyr. Sheshim – beıbitshilikte, – dep oıyn túıindedi ol.
Eske sala ketsek, jýyrda Eýroodaq kóshbasshylary BUU Bas hatshysymen kezdesti.
Sondaı-aq buǵan deıin BUU basshylyǵy Ormýz buǵazymen ótetin gýmanıtarlyq júkter qaýipsiz jetkizilýge tıis ekenin málimdedi.
