BUU Bas Assambleıasynyń tóraǵasy Abdýlla Shahıd Qazaqstanǵa resmı saparmen keledi

NUR-SULTAN. QazAqparat – Birikken Ulttar Uıymy Bas Assambleıasy 76-sessııasynyń tóraǵasy Abdýlla Shahıd 11-12 tamyz aralyǵynda Qazaqstanǵa resmı saparmen keledi, dep habarlaıdy QazAqparat Qazaqstandaǵy BUU keńsesi baspasóz qyzmetine silteme jasap.

Sapar barysynda QR Prezıdenti Qasym-Jomart Toqaev, QR Syrtqy ister mınıstrliginiń basshylyǵy, QR Parlamenti Senatynyń basshylyǵy, azamattyq qoǵam uıymdary, sondaı-aq BUU-nyń Qazaqstandaǵy eldik tobymen kezdesýler josparlanǵan.

Abdýlla Shahıd Maldıv Respýblıkasynyń úkimeti men zań shyǵarýshy organdarynda uzaq jumys istegen kórnekti saıasatker jáne bilikti dıplomat retinde keńinen tanymal.

Genderlik teńdiktiń qaıratty jaqtaýshysy óz eliniń dıplomatııalyq mıssııalarynyń basshylary, sondaı-aq syrtqy qyzmet qyzmetkerleriniń arasynda alǵash ret genderlik teńdikke qol jetkizgen.

Jalǵasyp jatqan COVID-19 pandemııasynyń tusynda Abdýlla Shahıd halyqaralyq arenada alǵashqylardyń biri bolyp sóılep, jahandyq densaýlyq daǵdarysynyń shaǵyn araldyq damýshy memleketterdiń ekonomıkasy men qoǵamdaryna joıqyn áserin atap ótti.

Aıta ketsek, bıyl Qazaqstannyń Birikken Ulttar Uıymyna músheligine 30 jyl.

Foto: news.un.org