BUU Bas Assambleıasy uıymnyń aımaqtyq ortalyǵyn Almatyda ashý týraly qarar qabyldady

ASTANA. KAZINFORM – Búgin BUU Bas Assambleıasy 152 eldiń birlesken avtorlyǵymen Ortalyq Azııa men Aýǵanstan úshin Ornyqty damý maqsattary jónindegi BUU-nyń aımaqtyq ortalyǵyn Almatyda ashý týraly qarardy konsensýs negizinde qabyldady.

Bul týraly búgin óziniń Telegram paraqshasynda Qazaqstan Respýblıkasy Prezıdentiniń keńesshisi – Prezıdenttiń Baspasóz hatshysy Rýslan Jeldibaı jazdy.

- Bul – elimizdiń syrtqy saıasattaǵy aıtýly jetistigi. Prezıdent Qazaqstannyń bastamasyn qoldaǵany úshin barlyq seriktes-elderge rızashylyq bildirdi, - dep jazdy ol.

Memleket basshysynyń pikirinshe, BUU-nyń Aımaqtyq haby halyqaralyq is-qımyldy úılestirýdiń mańyzdy alańyna aınalady.

Qazaqstannyń BUU-daǵy alǵashqy turaqty ókili Aqmaral Arystanbekova Kazinform agenttiginiń tilshisine bergen suhbatynda Qazaqstannyń Birikken Ulttar Uıymy qyzmetindegi eleýli róli týraly aıtty.