BUU Bas Assambleıasy UQShU qatysty qaýly qabyldady
ASTANA.KAZINFORM - 18 qarasha kúni BUU Bas Assambleıasynyń 79-sessııasy barysynda Birikken Ulttar Uıymy men Ujymdyq qaýipsizdik sharty uıymy arasyndaǵy yntymaqtastyq týraly qarar qabyldandy. Bul týraly UQShU baspasóz qyzmeti habar taratty.
Qujatta UQShU óziniń bitimgershilik áleýetin jáne óńirlik qaýipsizdik pen turaqtylyq júıesin nyǵaıtýǵa, terrorızmge jáne uıymdasqan transulttyq qylmysqa qarsy is-qımylǵa, esirtki men qarýdyń zańsyz aınalymyna, zańsyz kóshi-qon men adam saýdasyna qarsy kúreske jáne Birikken Ulttar Uıymynyń maqsattary men erejelerin iske asyrýǵa járdemdesetin tabıǵı jáne tehnogendik apattardyń saldaryn joıýǵa eleýli úles qosatyny atap kórsetilgen.
Bas Assambleıa BUU Bas hatshysyn ekijaqty baılanystar men túrli formattaǵy forýmdar aıasynda UQShU Bas hatshysymen turaqty konsýltatsııalar ótkizýdi jalǵastyrýǵa shaqyrdy.
BUU men UQShU BUU-nyń lańkestikke qarsy jahandyq strategııasyn jan-jaqty júzege asyrý maqsatynda yntymaqtastyqty jalǵastyrady.
Eki uıym da bitimgershilik salasyndaǵy yntymaqtastyqty odan ári arttyrý joldaryn qarastyrady.
BUU Bas Assambleıasy óziniń 81-sessııasynyń ýaqytsha kún tártibine «BUU men óńirlik jáne basqa uıymdar arasyndaǵy yntymaqtastyq» tarmaǵyna sáıkes «Birikken Ulttar Uıymy men Ujymdyq qaýipsizdik sharty uıymy arasyndaǵy yntymaqtastyq» degen tarmaqshany engizý týraly sheshim qabyldady.