BUU Bas assambleıasy Semeı óńirin saýyqtyrý týraly qarardy biraýyzdan qabyldady
Birikken Ulttar Uıymy Bas assambleıasynyń jalpy otyrysynda Qazaqstannyń Semeı óńirinde halyqty ońaltý, qorshaǵan ortany qalpyna keltirý jáne ekonomıkalyq damytý maqsatyndaǵy halyqaralyq yntymaqtastyq jáne áreketti úılestirý týraly qarar biraýyzdan qabyldandy, dep habarlaıdy Kazinform.
«Bul BUU Bas Assambleıasynyń Semeı óńirine arnalǵan 11-shi qarary. Onyń alǵashqysy 1997 jyly qabyldandy. BUU-ǵa múshe 85 memleket qarardyń birlesken avtorlyǵyna qosyldy.
Semeı óńiri boıynsha qabyldanǵan qarar – halyqtyń, ásirese jas balalar men basqa da osal toptaǵy adamdardyń ómiri men densaýlyǵyna ıadrolyq synaqtardyń uzaq merzimdi saldaryna halyqaralyq qoǵamdastyqtyń alańdaýshylyǵynyń kórnekti dáleli», – delingen QR Syrtqy ister mınıstrliginiń málimetinde.
Málimetke súıensek, qujatta Semeı óńiriniń qajettilikterin qanaǵattandyrý úshin ishki resýrstar bólýdegi Qazaqstan Úkimetiniń mańyzdy róli týraly aıtylǵan. Sondaı-aq qarar halyqaralyq qaýymdastyqty «Zardap shekken halyqty emdeý men olarǵa qyzmet kórsetý úshin arnaıy baǵdarlamalar men jobalardy ázirleýde jáne júzege asyrýda, sondaı-aq Semeı óńiriniń ekonomıkalyq ósýi men ornyqty damýyn qamtamasyz etý boıynsha kúsh-jigerde Qazaqstanǵa kómek berýge» shaqyrady.
