BUU Bas Assambleıasy Qyrǵyzstannyń shekara daýlaryn beıbit jolmen sheshý týraly qararyn qabyldady
BІShKEK. KAZINFORM – BUU Bas Assambleıasy Qyrǵyzstan bastamashylyq etken «Shekara daýlaryn beıbit jolmen sheshý týraly» qararyn konsensýspen qabyldady, dep habarlaıdy Kazinform agenttiginiń Bishkektegi menshikti tilshisi.
Qyrǵyzstan Syrtqy ister mınıstrliginiń málimetinshe, qujatty 40-tan astam el birlesip qoldady. Qarardy Qyrǵyzstan, Tájikstan jáne Ózbekstan birlesip usyndy.
Onyń basty maqsaty – halyqaralyq qaýymdastyqpen aımaq elderiniń tarıhı jetistigin bólisý: olardyń sezimtal máselelerdi BUU Jarǵysy men halyqaralyq quqyqqa sáıkes beıbit quraldar, dıalog pen kelissóz arqyly sheshý múmkindigi.
Ortalyq Azııanyń tájirıbesi búkil halyqaralyq qaýymdastyq úshin syndarly úlgi, tatý kórshilik qarym-qatynas úlgisi jáne aımaq elderiniń halyqaralyq beıbitshilik pen qaýipsizdikti nyǵaıtýǵa qosqan úlesi bolatyny atap ótildi.
- Qarardyń qabyldanýy Qyrǵyz Respýblıkasy men aımaq elderiniń ondaǵan jyldar boıy sheshilmeı kele jatqan ózekti máselelerdi beıbit jolmen sheshý múmkindigin taǵy da rastaý jáne moıyndaý múmkin ekenine taǵy bir dálel boldy, - delingen málimdemede.
Osyǵan deıin Qyrǵyzstan álem kóshbasshylaryn eldiń BUU Qaýipsizdik Keńesine kandıdatýrasyn qoldaýǵa shaqyrǵany habarlandy.
