Atyraýdaǵy kompanııaǵa 1,4 mlrd teńge aıyppul salyndy
ASTANA. KAZINFORM — Atyraý oblysynda «Potentsıal Oıl» JShS qorshaǵan ortany qorǵaý talaptaryn buzǵany úshin 1,4 mıllıard teńgeden astam ákimshilik aıyppul tóledi.
Atyraý oblysynyń ekologııa departamenti kásiporynnyń qyzmetine qorshaǵan ortany qorǵaý zańnamasynyń saqtalýyna qatysty tekserý júrgizgen. Nátıjesinde birqatar zańbuzýshylyq anyqtalǵan.
Atap aıtqanda, kásiporynda óndiristik ekologııalyq baqylaý men aǵyndy sýlardy baqylaý talaptary saqtalmaǵan. Sonymen qatar mindetti ekologııalyq esepterdi ýaqytynda tapsyrmaý, keshiktirý jáne eseptilikti talapqa saı júrgizbeý faktileri tirkelgen.
Tekserý barysynda lastaýshy zattardyń qorshaǵan ortaǵa shyǵarylýy jáne jekelegen jumystardyń tıisti ekologııalyq ruqsatsyz júrgizilgeni anyqtaldy. Budan bólek, belgilengen shyǵaryndylar lımıtinen asyp ketý jáne óndiris pen tutyný qaldyqtaryn basqarý talaptaryn buzý jaǵdaılary bolǵan.
— Sondaı-aq lastanǵan topyraq pen túptik shlamnyń qajetti ekologııalyq ruqsattarsyz jáne bekitilgen lımıtterden tys kólemde jınalǵany anyqtaldy. Al kásiporynnyń qaldyqtardy basqarý baǵdarlamasy is júzinde túzilgen qaldyqtardyń naqty kólemi men túrlerine sáıkes kelmegen, — delingen habarlamada.
Tekserý qorytyndysy boıynsha kompanııaǵa jalpy somasy 1,4 mıllıard teńgeden asatyn ákimshilik aıyppul salyndy.
«Potentsıal Oıl» JShS bul sharalarǵa sot arqyly shaǵymdanǵan. Alaıda birinshi jáne apellıatsııalyq satylardaǵy sottar kompanııanyń talaptaryn qanaǵattandyrmady.
Qazirgi ýaqytta memleketke salynǵan ákimshilik aıyppuldyń tolyq somasy — 1,4 mıllıard teńgeden astam qarajat óndirildi.
Eske salaıyq, buǵan deıin Jańaózendegi gaz óńdeý zaýytyna ekologııalyq talaptardy buzǵany úshin aıyppul salynǵanyn habarlaǵan edik.
