BUU Bas Assambleıasy Folker Tıýrktiń ókilettik merzimin uzartty
ASTANA. KAZINFORM — Daýys berý barysynda 144 memleket Folker Tıýrktiń ókilettik merzimin uzartýdy qoldady. Bul týraly Anadoly agenttigi jazdy.
Birikken Ulttar Uıymynyń (BUU) Bas Assambleıasy AQSh pen Reseıdiń qarsylyǵyna qaramastan, Folker Tıýrktiń BUU-nyń Adam quqyqtary jónindegi joǵarǵy komıssary qyzmetindegi ókilettik merzimin taǵy tórt jylǵa uzartty.
Daýys berý nátıjesinde 144 el Tıýrktiń qyzmetin jalǵastyrýyna «qoldaý» bildirdi.
AQSh, Reseı jáne Izraıldi qosa alǵanda, 10 memleket bul sheshimge «qarsy» daýys berdi. Taǵy 13 el qalys qaldy.
Folker Tıýrk 2022 jyldyń qazan aıynan beri BUU-nyń Adam quqyqtary jónindegi joǵarǵy komıssary qyzmetin atqaryp keledi. Daýys berý nátıjesine sáıkes, onyń ekinshi merzimge taǵaıyndalýy 2026 jylǵy 12 qazannan 2030 jylǵy 11 qazanǵa deıingi kezeńge túpkilikti bekitildi.
Folker Tıýrktiń ókilettik merzimi taǵy tórt jylǵa uzartylatyny týraly aqparat taraǵannan keıin, BUU qyzmetin baqylaýmen aınalysatyn jáne Izraıldi qoldaıtyn ustanymymen tanymal UN Watch úkimettik emes uıymy arnaıy naýqan bastady.
Uıym áleýmettik jelilerde Tıýrkti qatty synǵa alyp, onyń qyzmet atqarǵan kezeńinde Izraıldi 58 ret aıyptaǵanyn, al AQSh-ty Qytaı, Soltústik Koreıa jáne Kýbaǵa qaraǵanda jıi synaǵanyn málimdedi. Sondaı-aq uıym Tıýrktiń Irannyń AQSh pen Izraıl shabýyldaryna bergen jaýabyn «qarymta sharalar» dep sıpattaǵanyn atap ótti.
Sonymen qatar, BUU Bas hatshysy Antonıý Gýterrısh Adam quqyqtary jónindegi joǵarǵy komıssar Folker Tıýrktiń atqarǵan jumysyna rızashylyǵyn bildirdi.
Aıta keteıik, buǵan deıin BUU basshysy Iran men AQSh-ty kelissózdi shuǵyl qaıta bastaýǵa shaqyrǵan bolatyn.
