BUU Bas Assambleıasy álem kartasynyń jańa úlgisin maquldady
ASTANA. KAZINFORM – BUU Bas Assambleıasy qurlyqtardyń naqty kólemin dálirek kórsetetin álem kartasyn qoldanýǵa kóshý týraly qarardy maquldady, dep habarlaıdy Deutsche Welle.
Qarardy 164 memleket qoldady. AQSh qarsy daýys berse, taǵy alty memleket qalys qaldy.
Bastamany Togo men Afrıka odaǵy usynǵan. Olar halyqaralyq uıymdar men memleketterdi aldaǵy ýaqytta Equal Earth proektsııasyndaǵy kartalardy paıdalanýǵa shaqyrdy.
Equal Earth kartasynyń basty ereksheligi – qurlyqtardyń kólemin olardyń naqty aýdanyna barynsha sáıkes kórsetýi. Máselen, bul kartada Afrıka ádettegi álem kartalaryndaǵydan úlkenirek kórinse, AQSh aýmaǵy salystyrmaly túrde kishirek beınelenedi.
Jańa karta keńinen qoldanylyp kelgen Merkator proektsııasyna balama retinde usynylyp otyr. Merkator kartasyn 1512 jyly Flandrııada dúnıege kelgen kartograf Gerard Merkator jasaǵan. Ol bastapqyda teńizde júzýge arnalǵandyqtan, joǵary endikterdegi aýmaqtardyń kólemin shynaıy mólsherinen úlken etip kórsetedi.
– Kartalar bizdiń álem týraly túsinigimizdi qalyptastyrady. Biraq olar eshqashan beıtarap bolmaıdy. Kartalar planetamyz týraly burmalanǵan túsinik qalyptastyryp, urpaqtan urpaqqa beriletin jańsaq paıymdardy kúsheıtýi múmkin, – dedi Togo Syrtqy ister mınıstri Robert Dıýsse BUU Bas Assambleıasynda.
Equal Earth proektsııasyn 2018 jyly geograftar toby ázirlegen. Onyń maqsaty – qurlyqtardyń kartadaǵy beınesin olardyń naqty kólemine barynsha sáıkestendirý.
Nátıjesinde Equal Earth kartasynda Afrıka, Latyn Amerıkasy, Ońtústik Azııa jáne Okeanııa keń taralǵan álem kartalaryndaǵydan edáýir úlken bolyp kórinedi.
Aıta keteıik, BUU aptap ystyq pen tabıǵı apattar kúsheıýi múmkin ekenin eskertti.
