BUU: Balalardy buqalar saıysyna jibermeý kerek
ASTANA. QazAqparat - BUU-nyń balalar quqyǵy jónindegi komıteti portýgalııalyq bılikti eldiń kámeletke tolmaǵan azamattaryn korrıdany (toreadordyń buqamen jekpe-jegi) tamashalaýdan nemese oǵan qatysýdan qorǵaýǵa shaqyrdy.
BUU ókilderiniń paıymynsha, bul balanyń júıkesi men densaýlyǵyna túzetilmeıtin áser qaldyrýy múmkin.
Uıym qyzmetkerleriniń málimetinshe, Portýgalııada kez kelgen jastaǵy balalar qandy shoýdyń ádis-tásilin oqytýǵa arnalǵan kýrstarǵa jiberiledi eken. Sonymen qatar buqalar saıysyn stadıonda alty jasynan qaraýǵa bolady.
Osy oraıda mamandar atalǵan kórinisti tamashalaý boıynsha jas aralyǵynyń shekteýi aıtarlyqtaı joǵarylaýy tıis ekenin alǵa tartýda.
Ispanııaǵa qaraǵanda Portýgalııadaǵy korrıda erejesi ózgesheleý, ıaǵnı onda kórermender aldynda buqany óltirýge bolmaıdy. Alaıda, osy saıys barysynda buqany uryp jyǵyp, ony aqyr sońynda qasaphanaǵa jiberedi.
Ázirge, BUU-nyń osy baıandamasyna baılanysty Portýgalııa bıligi eshqandaı málimdeme jasaǵan joq.
