BUU: Azyq-túlikti óndirý men tutyný ádisterin ózgertý kerek

NUR-SULTAN. QazAqparat – Álem boıynsha júz mıllıonǵa jýyq adam jetkilikti tamaqtanbaıdy nemese semizdikpen aýyrady. Sol sebepti azyq-túlikti óndirý men tutyný ádisterine ózgeris engizý kerek. Bul týraly BUU Bas hatshysy Antonıý Gýterrısh Nıý-Iorktegi BUU-nyń shtab-páterinde ótken Bas Assambleıanyń 76-shy sessııasy aıtty, dep habarlaıdy QazAqparat BUU-nyń jańalyqtar saıtyna silteme jasap.

«Úsh mıllıard adam durys tamaqtanbaıdy. Eki mıllıard adamnyń artyq salmaǵy bar nemese semizdikpen aýyrady. Al 462 mıllıon adam ashtyqta ómir súrýde», - dedi BUU basshysy.

BUU basshysy jańa ekologııalyq qaýipsiz azyq-túlik júıelerin qurý qajet dep sanaıdy. Antonıý Gýterrısh pen sammıttiń ózge qatysýshylary azyq-túlik júıelerin qaıta qarap, adamdardyń densaýlyǵyn jaqsartý, olardyń ál-aýqatyn kóterip, ǵalamshardy saýyqtyrý úshin úsh negizgi maqsat qoıýdy usynyp otyr. Onyń aıtýynsha, azyq-túlik júıeleri barlyq adamnyń densaýlyǵy men ál-aýqatyn nyǵaıtýǵa yqpaldasýy kerek jáne ǵalamshardy qorǵaýy tıis. Oǵan qosa, júıeler tek qana bıznes pen úleskerlerdiń ál-aýqatyn emes, sonymen qatar fermerler men azyq-túlik ónerkásibinde qyzmet etetin jumysshylardy qoldaýy kerek.