BUU azaptaýdyń aldyn alý delegatsııasy elimizdegi túrmelerdi tekserdi

ASTANA. QazAqparat – Birikken ulttar uıymy ókilderinen qurylǵan arnaıy delegatsııa Qazaqstannyń túrmeleri men ýaqytsha ustaý ızolıatoryndaǵy jaǵdaıdy baqylady. Bul týraly Syrtqy ister mınıstrliginde ótken brıfıng barysynda belgili boldy, dep habarlaıdy QazAqparat tilshisi.

«Bıyl 26 naýryz ben 1 sáýir aralyǵynda BUU azaptaýdyń aldyn alý jónindegi kishi komıtetiniń delegatsııasy Qazaqstanǵa sapar jasady. Onyń barysynda delegatsııa músheleri Adam quqyqtary jónindegi ýákilmen, QR Konstıtýtsııalyq sotynyń tóraıymymen, memlekettik organdardyń ókilderimen, sondaı-aq azaptaýǵa qarsy ulttyq aldyn alý tetiginiń múshelerimen, azamattyq qoǵam jáne BUU qurylymdary ókilderimen kezdesti. Delegatsııa ókilderi túrmelerde, tergeý jáne ýaqytsha ustaý ızolıatorlarynda, sondaı-aq polıtsııa bólimsheleri men qamaýda ustaý oryndarda bolyp, jaǵdaıdy baqylady», - dedi SІM resmı ókili Aıbek Smadııarov.

Onyń málimdeýinshe, BUU azaptaýdyń aldyn alý jónindegi kishi komıtet delegatsııasy elimizge osymen ekinshi ret sapar shegip otyr.

«Bul sapar Memleket basshysymyzdyń saıası reformalaryn júzege asyrý maqsatynda Qazaqstan qabyldaǵan halyqaralyq mindettemeler men usynymdardy júzege asyrýdaǵy ashyqtyǵyn ári beıildiligin rastaǵanyn atap ótken jón. BUU-nyń azaptaýdyń aldyn alý jónindegi kishi komıteti 6 aıdyń ishinde Qazaqstan Úkimetine bas bostandyǵynan aıyrylǵan adamdarǵa qatysty azaptaýdyń jáne basqa da qatygezdik pen jazalaýdyń aldyn alý boıynsha eskertýleri men usynymdaryn usynady», - deıdi ol.