«BUU-Áıelder» Qazaqstanǵa jańa genderlik teńdik strategııasyn ázirleýge kómektesedi - E. Tarasenko

ASTANA. QazAqparat - «BUU-Áıelder» Qazaqstanǵa jańa genderlik teńdik strategııasyn ázirleýge kómektesedi. Bul týraly QR Prezıdenti janyndaǵy Áıelder jáne otbasy-demografııalyq saıasat jónindegi ulttyq komıssııa tóraıymynyń orynbasary, Parlament Májilisiniń depýtaty Elena Tarasenko málim etti.

Eske salaıyq, búgin Aqordada QR Memlekettik hatshysy, QR Prezıdenti janyndaǵy Áıelder jáne otbasy-demografııalyq saıasat jónindegi ulttyq komıssııanyń tóraıymy Gúlshara Ábdiqalyqova Ortalyq Azııadaǵy «BUU-Áıelder» kóp eldik bólimshesiniń dırektory, Qazaqstandaǵy «BUU-Áıelder» ókili Ileın Konkevıchpen kezdesti. Al kezdesýge Májilis depýtaty Elena Tarasenko da qatysqan bolatyn.

«Biz «BUU-Áıelder» uıymynyń tarapynan jasalyp jatqan qoldaýǵa rızashylyǵymyzdy bildiremiz, óıtkeni elimizde genderlik teńdik máselesiniń jetistigine qaraı jyljýymyz qajet. Alǵa qoıylǵan mindetterdi sheshýge tıispiz. Al olardyń qatarynda áıelder men erlerdiń quqyqtary men múmkindikterin keńeıtý, bala týý jasyndaǵylardyń densaýlyǵyn nyǵaıtý, turmystyq zorlyqqa qarsy turý sekildi máseleler barshylyq. Biz osy baǵyttaǵy jumystar tıimdi atqarylyp jatyr dep sanaımyz», - dedi E.Tarasenko.

Onyń aıtýyna qaraǵanda, ekonomıkalyq teńquqylyq máselesi Ulttyq komıssııanyń nazarynan tys qalǵan emes. Al Qazaqstannyń genderlik saıasat boıynsha statıstıkalyq kórsetkishteri de jaǵymdy. Buǵan BUU áıel isteri jónindegi Komıtetiniń Kezekti merzimdi baıandamasynda da mán berilgen.

«BUU-Áıelder» Uıymy Ulttyq komıssııaǵa tehnıkalyq qoldaýlar kórsetýdi jalǵastyrý nıetin bildirip keledi. Atap aıtqanda, «BUU-Áıelder» Uıymynyń kómegimen buǵan deıin qabyldanǵan 2006-2016 jyldarǵa arnalǵan genderlik teńdik strategııasynyń ornyna jańa qujat ázirleýge olar qoldaý kórsetýge nıetti», - dedi E. Tarasenko.