BUU Áıelder, balalar jáne jasóspirimderdiń densaýlyǵyn saqtaý baǵdarlamasyna 25 mıllıard dollar salmaq

ASTANA. QazAqparat - BUU-nyń Bas hatshysy Pan Gı Mýn Áıelder, balalar jáne jasóspirimderdiń densaýlyǵyn saqtaý boıynsha Jahandyq strategııanyń iske qosylǵany týraly jarııalady. Bul bastamanyń basty maqsaty - 2030 jylǵa qaraı áıelder, balalar jáne jasóspirimderdiń ólim paıyzyn tómengi deńgeıge deıin qysqartyp, sondaı-aq olardyń densaýlyǵynyń jaqsarýyna, amandyǵyna septigin tıgizý.

Aldaǵy bes jylda baǵdarlamaǵa 25 mıllıard AQSh dollary salynatyn bolady.

Jańa strategııa álemdik kóshbasshylardyń turaqty damý sammıtinde qabyldaǵan Turaqty damý salasyndaǵy aldaǵy 15 jyldaǵy maqsattar men mindetterdi iske asyrýdyń bir bóligi bolyp tabylady, dep habarlaıdy BUU-nyń jańalyqtar ortalyǵynan.

Sammıtke jınalǵan memleket jáne úkimet basshylary, halyqaralyq uıymdar men jekemenshik sektordyń ókilderi, ǵalymdar jáne BUU-nyń ózge seriktesteri bul bastamaǵa qoldaý bildirdi. Bul bastama áıelder, balalar jáne jasóspirimderdiń arasyndaǵy ólimdi qysqartyp, sondaı-aq olardyń densaýlyǵyn jaqsarýyna, amandyǵyna septigin tıgizýge baǵyttalǵan.

«Búgin men sóz etip otyrǵan Áıelder, balalar jáne jasóspirimderdiń densaýlyǵyn saqtaý salasyndaǵy Jahandyq strategııa ómirge beıimdi jáne deni saý qoǵamdy qalyptastyrýǵa kómektese alady. Biz seriktesip júrgizip otyrǵan jumysymyzdyń jemis berip otyrǵanyn dáleldedik. Men de, BUU-nyń búkil júıesi de aldaǵy ýaqytta aramyzdaǵy názik jandylardyń ómirin saqtaý jáne jaqsartý úshin bar kúshimizdi salatyn bolamyz», - dedi Pan Gı Mýn.