BUU áıel teńdigin qamtamasyz etetin qujatty qabyldady
ASTANA. 18 naýryz. QazAqparat - BUU-ǵa múshe elder, sonyń ishinde konservatıvti katolıktik jáne musylman memleketteri uzaq ýaqytqa sozylǵan kelissózden keıin áıelderdi zorlyq-zombylyqtan qorǵaýǵa arnalǵan maǵlumdamany qabyldady.
Naýryzdyń 15-i kúni qabyldanǵan qujatqa oraı barlyq elder ózderiniń salt-dástúrin nemese dindi jeleý etip, áıelderge kúsh qoldanbaıtyn boldy. Maǵlumdamada zorlyq-zombylyqqa ushyraǵandarǵa shuǵyl kómek kórsetý jáne genderlik jańsaq uǵymǵa jol berip, kisi óltirgenderdi qatań jazalaý qarastyrylǵan. Qujatta, sondaı-aq adamnyń seksýaldy baǵdaryna baılanysty artyqshylyqqa jol berilmeıtindigi aıtylǵan.
muslim.kz saıtynyń jazýynsha, 17-betten turatyn atalmysh qujattyń eki apta boıy talqylanyp baryp, qabyldanǵanyn aıta ketý kerek. Qyzý pikirtalasqa arqaý bolǵan qujatqa búkilálemdik uıymǵa kiretin 193 el kelisimin berdi.
Ansar.Ru aqparat agenttigi habarlaǵandaı, bul qujatqa mysyrlyqtar qatty qarsylyq kórsetken. Osy eldegi yqpaly zor «Musylman baýyrlar» qozǵalysy bul qujattyń ıslam ustanymyna qaıshy keletinin jáne otbasy ınstıtýtyn shaıqaltatynyn alǵa tartqan. Osyǵan oraı Mysyr qujatty ár el óz ádet-ǵurpy men zańdaryna qaraı qoldaný quqyǵyn engizýdi usyndy.
Alaıda, mysyrlyqtardyń bul usynysy ózge elder tarapynan qoldaý tappady. Degenmen mysyrlyq delegatsııa BUU-ǵa múshe elder biraýyzdan kelisimin berýi tıis bul jobanyń qabyldanýyna bóget jasaǵan joq.
Sonymen birge, keıbir Lıvan, Sýdan, Iran sekildi musylman elderimen qatar Vatıkan men Reseı de qujatqa óz talap-tilekterin engizbek boldy. Olar túsik jasatýǵa jáne zorlanǵan áıelderdi májbúrlep moıyndatýǵa qatysty tarmaqtardy jumsartýǵa talpyndy. Ózge elder seksýaldy azshylyqtyń quqyǵyn qorǵaýǵa qatysty erejeden bas tartý arqyly olarmen ymyraǵa kelip, joǵaryda sóz bolǵan tarmaqtar óz kúshinde qalatyn boldy.
BUU-nyń Áıelder isi jónindegi komıtet basshysy Mıshel Bachelet qujattyń tarıhı mánine toqtaldy. Onyń aıtýynsha, álem áıelderi budan bylaı óz quqyqtaryn qorǵaýdyń tıimdi quralyna ıe bolmaq. Onyń bul pikirimen BUU Bas hatshysy Pan Gı Mýn de kelisip otyr. Ol áıelderge kórsetilgen zorlyq-zombylyqty búkil álemge tóngen qaýip retinde qaraıdy.
Atalmysh qujattyń 2003 jyly qabyldanbaı qalǵanyn aıta ketý kerek. Ol kezde BUU-ǵa múshe elder túsik jasatý, áıelderdiń dinı talaptar men salt-dástúr boıynsha artyqshylyqqa ıe bolý máseleleri boıynsha bir mámilege kele almaǵan edi.
