BUU «Ash-Shabab» terrorlyq uıymyna qarsy sanktsııalardy uzartty

ASTANA. KAZINFORM — BUU Qaýipsizdik Keńesi «Ash-Shabab» terrorlyq uıymyna qarsy sanktsııalardy 2026 jylǵy 30 qarashaǵa deıin uzartqanyn málim etti. Bul týraly Anadoly habarlady.

Ulybrıtanııa usynǵan rezolıýtsııany keńestiń 15 múshesi bir aýyzdan qoldady.

Rezolıýtsııaǵa sáıkes, 2026 jylǵy 30 qarashaǵa deıin kemelerge qatysty aralasý quqyǵy uzartylyp, zańsyz qarý ımportyna embargo, kómir eksportyna tyıym jáne jarylǵysh zattar jasaý komponentterine shekteýler saqtalady.

Sonymen birge, qarýǵa embargo, saıahatqa tyıym jáne múlik pen qarjyny buǵattaý sııaqty sharalar «Ash-Shabab» uıymyna qatysty sheksiz ýaqytqa áreket etedi.

Daýysqa salýdan keıin Ulybrıtanııanyń BUU-degi turaqty ókiliniń orynbasary Djeıms Karıýkı rezolıýtsııany qabyldaǵanyn qoldady. Ol Qaýipsizdik Keńesiniń barlyq múshelerine kelissózderge konstrýktıvti qatysqany úshin alǵys aıtty.

Karıýkı bul sheshimniń «Ash-Shababtyń qarýǵa qol jetkizýin, qarjylyq resýrstaryn álsiretýdi jáne Somalıdaǵy áleýetin shekteýdi kúsheıtetinin» atap ótti.

Eske sala keteıik, «Ash-Shabab» 2007 jyldan beri Somalı úkimetine jáne Afrıka odaǵy kúshterine shabýyl jasap, qalalyq jáne aýyldyq aımaqtarda terrorlyq aktiler júzege asyryp keledi. Uıym 2010 jylǵy 12 sáýirde BUU sanktsııalyq tizimine engizilgen.

2024 jylǵy qańtarda BUU tikushaǵy Somalıda apatty jaǵdaıda qonǵan kezde «Ash-Shabab» músheleri ony basyp alǵan bolatyn.

Sonymen qatar «Ash-Shabab» tobynyń sodyrlary el astanasy Mogadıshodaǵy federaldy sheneýnikter jıi kezdesýler ótkizetin Hayat qonaq úıin basyp alyp, ǵımaratty bir kúnnen artyq ustaǵan.