BUU: álemde 2 mıllıard adam taza aýyz sýǵa qol jetkize almaı otyr
ASTANA. KAZINFORM — Birikken Ulttar Uıymy málimetinshe, álemde 2 mıllıardtan astam adam taza aýyz sýǵa qol jetkize almaıdy. Bul týraly BUU-nyń adam quqyqtary jónindegi Joǵarǵy komıssarynyń orynbasary Nada ál-Nashıf Adam quqyqtary jónindegi keńeste ótken otyrysta aıtty.
Onyń sózinshe, jyl saıyn shamamen 1,4 mıllıon adam lastanǵan sý men sanıtarııanyń joqtyǵynan týyndaıtyn juqpaly aýrýlardan kóz jumady. Olardyń qatarynda tyrysqaq, dıareıa jáne ish súzegi sııaqty aýrýlar bar.
Sonymen qatar, álemde 3,4 mıllıard adam tıisti sanıtarlyq jaǵdaıǵa qol jetkize almaı otyr.
Nada ál-Nashıf bul másele jaı ǵana qolaısyzdyq emes, adamnyń ómiri men ólimine tikeleı áser etetin jahandyq problema ekenin atap ótti.
Onyń aıtýynsha, sýǵa qoljetimdilik máselesi qaqtyǵystar jaǵdaıynda odan ári ýshyǵyp otyr. Mysaly, Ýkraına, Gaza sektory jáne Sýdan sııaqty aımaqtarda sý ınfraqurylymy zaqymdalyp, taza sýǵa qol jetkizý qıyndaǵan.
Sondaı-aq klımattyń ózgerýi de jaǵdaıdy nasharlatýda: qurǵaqshylyq jıilep, sý tasqyny men daýyldar sý júıelerin buzǵan.
BUU ókili kedeı jáne qaryzǵa batqan elder sý ınfraqurylymyna ınvestıtsııa salýda qıyndyq kóretinin, al damyǵan elderde de sý tarıfteriniń qymbattaýy halyqqa salmaq túsirip otyrǵanyn aıtty.
Onyń sózinshe, bul jaǵdaı ásirese álsiz toptarǵa aýyr tıedi: múgedektigi bar adamdarǵa beıimdelgen sanıtarlyq jaǵdaı jetispeıdi, al áıelder men qyzdar sý izdep uzaq jol júrýge májbúr bolyp, qaýip-qaterge ushyraıdy.
Mektepterdegi sanıtarııanyń nasharlyǵy qyz balalardyń sabaqtan qalýyna sebep bolyp otyr.
— Sý — bul taýar emes, qoǵamdyq ıgilik, — dedi ol.
BUU bul máseleni sheshý úshin memleketterdi ınvestıtsııany arttyrýǵa, halyqaralyq yntymaqtastyqty kúsheıtýge jáne adam quqyqtary negizinde saıasat júrgizýge shaqyryp otyr.
Buǵan deıin BUU Gazada dári-dármek tapshylyǵy men kemirgishterdiń kóbeıýine baılanysty teri ınfektsııalary órship ketkenin aıtyp, dabyl qaqqan edi.
