Qazaqstan BUU-nyń Almatydaǵy óńirlik ortalyǵyna jyl saıyn 3 mln dollar bólip otyrady
ASTANA. KAZINFORM – Búgin Senattyń jalpy otyrysynda «Qazaqstan Úkimeti men BUU arasyndaǵy Qazaqstan Respýblıkasynda Birikken Ulttar Uıymynyń Ortalyq Azııa men Aýǵanstan úshin ornyqty damý maqsattary jónindegi óńirlik ortalyǵyn qurý týraly kelisimdi ratıfıkatsııalaý týraly» Zańy men ilespe qujat maquldandy.
- Bul zańdar Memleket basshysynyń halyqaralyq deńgeıdegi mańyzdy bastamasyn iske asyrý maqsatynda ázirlendi. Eki zańnyń da negizgi mindeti - atalmysh Ortalyqtyń tolyqqandy jumys isteýin quqyqtyq ári qarjylyq turǵydan qamtamasyz etý. Birinshi, kelisimge qatysty zań, uıymnyń quqyqtyq irgetasyn qalaıdy. Kelisim Ortalyqtyń naqty maqsattary men mindetterin bekitip, Birikken Ulttar Uıymynyń túrli agenttikteriniń qyzmetin bir shańyraq astyna biriktirý arqyly fýnktsııalardyń qaıtalanýyn boldyrmaýdy kózdeıdi. Sonymen qatar atalǵan Kelisim halyqaralyq konventsııaǵa sáıkes Ortalyq qyzmetkerlerine tıisti artyqshylyqtar men ımmýnıtetter berýdi zańdy túrde kepildendiredi, - dedi senator Bıbigúl Jeksenbaı.
Onyń aıtýynsha, ekinshi memorandýmǵa qatysty zań Ortalyqty qurýdyń qarjylyq-tehnıkalyq retteý tártibin aıqyndaıdy. Memorandýmǵa sáıkes Qazaqstan qabyldaýshy el retinde 2025-2029 jyldar aralyǵynda jyl saıyn 3 mıllıon AQSh dollary kóleminde erikti jarna tóleıdi. Bólingen qarajat Ortalyqty zamanaýı materıaldyq-tehnıkalyq turǵydan jaraqtandyrýǵa, IT-ınfraqurylymmen, baılanyspen qamtamasyz etýge jáne operatsııalyq shyǵyndardy jabýǵa jumsalady.
- Elimiz bul kórsetilgen lımıtten tys eshqandaı qosymsha shyǵyndar kótermeıdi, sondaı-aq bólingen somanyń 13 paıyzy Birikken Ulttar Uıymynyń ákimshilik súıemeldeýine baǵyttalyp, barlyq qarjylyq qyzmet uıymnyń ishki jáne syrtqy qatań aýdıt erejelerine saı júrgiziletin bolady. Sondaı-aq baǵdarlama aıaqtalǵannan keıin ǵımarat Qazaqstan Úkimetine tolyqtaı qaıtarylady. Bul Ortalyqtyń Qazaqstan úshin strategııalyq paıdasy óte zor, sebebi onyń Almatyda ornalasýy qalamyzdyń kópjaqty dıplomatııalyq jáne iskerlik hab retindegi halyqaralyq mártebesin odan ári bekite túsedi. Sonymen qatar bul qadam Birikken Ulttar Uıymynyń alańdarynda: bizdiń ulttyq basymdyqtarymyz ben múddelerimizdi ilgeriletý múmkindigin arttyrýǵa, otandyq mamandardyń halyqaralyq júıedegi ókildigin keńeıtýge jáne olardyń biliktiligin jańa deńgeıge kóterýge tikeleı yqpal etedi. Bul zańdardy ratıfıkatsııalaý resmı rásimderdi tolyq aıaqtap, Ortalyqtyń jumysyn jedel ári tıimdi bastaýǵa múmkindik beredi, - dedi depýtat.
Qujattardyń qoldanylý merzimi 5 jyldy quraıdy jáne keıinnen ony taǵy da uzartý múmkindigi qarastyrylǵan.
Budan buryn habarlanǵandaı, Ortalyq Azııa BUU Qaýipsizdik Keńesine qaıta oralýy múmkin.
