BUU AQSh-ty Gýantanamo túrmesin jabýǵa shaqyrdy
ASTANA. 6 sáýir. QazAqparat - BUU-nyń Adam quqyqtary jónindegi joǵarǵy komıssary Navı Pıllaı Gýantanamodaǵy abaqtyny jabý úshin amerıkalyq parlamenttiń kúsh-jigerin birigýge shaqyrdy.
Osy oraıda ol atalǵan túrmede halyqaralyq quqyqtyń normalary buzylyp otyrǵandyǵyn qadap aıtty, dep jazady VVS.
Tórt jyl buryn Pıllaı Kýbadaǵy amerıkalyq áskerı bazanyń aýmaǵynda ornalasqan túrmeni jabý jónindegi AQSh prezıdenti Barak Obamanyń ýádesin qoldaǵan bolatyn. Alaıda búginde ol bul baǵytta eshteńe de ózgermegenine kóńili qalyp otyrǵandyǵyn jetkizdi.
Pıllaı óz sózinde jaqynda qamaýda otyrǵandardyń ashtyq jarııalaýy, olardyń ábden ashynǵandyǵyn baıqatqanyn atap ótti. Lańkestik boıynsha kúdikti sanalatyn 160 adamnyń keıbiri Gýantanamoda 10 jyldan astam ýaqyt qamaýda otyr.
