BUU 2026 jyly Aýǵanstandaǵy ashtyq daǵdarysy ýshyǵady dep eskertedi

ASTANA. KAZINFORM — Birikken Ulttar Uıymynyń Gýmanıtarlyq máselelerdi úılestirý basqarmasy (OCHA) gýmanıtarlyq seriktestermen birlesip, 2026 jylǵa arnalǵan Aýǵanstan boıynsha gýmanıtarlyq qajettilikter men áreket etý josparyn iske qosty, dep habarlaıdy AZERTADJ.

Uıymnyń málimdeýinshe, qujattyń maqsaty – halyqtyń shuǵyl qajettilikterin qanaǵattandyrý jáne eldegi gýmanıtarlyq daǵdarystyń odan ári ýshyǵýyna jol bermeý.

OCHA Aýǵanstan Sýdan men Iemennen keıingi álemdegi eń iri gýmanıtarlyq daǵdarystardyń birin bastan keshirip otyrǵanyn atap ótti.

Boljam boıynsha, 2026 jyly shamamen 21,9 mıllıon adam, ıaǵnı el halqynyń jartysyna jýyǵy, gýmanıtarlyq kómekke muqtaj bolady.

Baıandamada aıtylǵandaı, azyq-túlik qaýipsizdiginiń bolmaýy gýmanıtarlyq qajettilikterdiń basty sebebi bolyp otyr. Shamamen 17,4 mıllıon adam azyq-túlik tapshylyǵyna tap bolady dep kútilýde. Al 4,7 mıllıon adam tótenshe jaǵdaı deńgeıindegi ashtyqty bastan ótkerýi múmkin.

Uıym daǵdarysty ýshyqtyryp otyrǵan negizgi faktorlar retinde qurǵaqshylyqty, klımattyq kúızelisterdi, kúnkóris kózderiniń joıylýyn jáne aýǵan mıgranttarynyń jappaı oralýyn atady.

Sonymen qatar tótenshe deńgeıdegi ashtyq kórsetkishi ótken jylmen salystyrǵanda 50 paıyzdan astam artqany aıtyldy.

Jalpy bıýdjeti 1,71 mıllıard dollar bolatyn jospar 17,5 mıllıon adamǵa kómek kórsetýdi kózdeıdi. Ásirese tabıǵı apattardan, sonyń ishinde qurǵaqshylyqtan, bosqyndardyń jappaı oralýynan, aýrýlardyń órshýinen, jer silkinisteri men basqa da apattardan eń kóp zardap shekken aımaqtarǵa basymdyq beriledi. 

Aıta ketelik Aýǵanstanda qalyń qar men nóser saldarynan 61 adam kóz jumǵan edi.