BUU 2026 jyly 135 mln adamǵa gýmanıtarlyq kómekke 33 mlrd dollar surady
ASTANA. KAZINFORM — Kelesi jyly 50 eldegi 135 mıllıon adamdy qoldaý úshin gýmanıtarlyq uıymdarǵa 33 mıllıard dollar qajet bolady. Bul týraly BUU jańalyqtary habarlady.
BUU jáne onyń seriktesteri soǵystan, klımattyq apat, jer silkinisi, indet pen ashtyqtan zardap shekken 87 mıllıon adamǵa jedel kómek kórsetý úshin aldymen 23 mıllıard dollar bólýdi surap otyr.
Bul qarajat dúısenbi kúni jarııalanǵan 2026 jylǵa arnalǵan Jahandyq gýmanıtarlyq jospardyń bir bóligi.
— Bul úndeý bizdiń ortaq kúshimizdiń eń aldymen qandaı baǵyttarǵa shoǵyrlanýy kerektigin aıqyndaıdy, — dedi qujatty tanystyrǵan BUU-nyń tótenshe kómek jónindegi úılestirýshisi Tom Fletcher.
Jańartylǵan jospar bıylǵy jyly Gýmanıtarlyq baǵdarlamalardyń kúrt qysqarýy, sondaı-aq gýmanıtarlyq uıymdardyń qyzmetkerlerine jasalǵan shabýyldarynyń rekordtyq sany aıasynda usynyldy.
Qujatta 29 daǵdarys oshaǵyna arnalǵan egjeı-tegjeıli jospar qamtylǵan. Eń aýqymdysynyń biri — okkýpatsııalanǵan Palestına aýmaǵy, munda úsh mıllıon adamǵa kómek kórsetý úshin 4,1 mıllıard dollar jınaý qajet.
Sýdanǵa 20 mıllıon adamǵa ómirlik mańyzdy kómek kórsetý úshin 2,9 mıllıard dollar qajet.
Sonymen qatar elden qashqan jeti mıllıon sýdandyqty qoldaý úshin qosymsha 2 mıllıard dollar kerek.
Eń iri óńirlik suranys Sırııaǵa qatysty — 8,6 mıllıon adamǵa kómek kórsetý úshin 2,8 mıllıard dollar.
2026 jyly Ýkraınadaǵy 4,1 mıllıon turǵyndy qoldaý úshin gýmanıtarlyq qurylymdar 2,3 mıllıard dollar surap otyr.
Tom Fletcher 2025 jylǵa arnalǵan gýmanıtarlyq josparǵa nebári 12 mıllıard dollar bólingenin, bul sońǵy on jyldaǵy eń tómen kórsetkish ekenin eske saldy. Sonyń saldarynan byltyrǵy jylmen salystyrǵanda 25 mıllıon adamǵa kem kómek kórsetilgen.
Bul saldardyń aýyr bolǵanyn atap ótti: adamdar azyq-túlikke jarymaı qaldy, densaýlyq saqtaý júıeleri júktemege tótep bere almady, «al Sýdan men Gazanyń birqatar óńirinde jappaı ashtyq jaılady».
— Áıelder men qyzdardy qorǵaý baǵdarlamalary qysqartyldy, júzdegen gýmanıtarlyq uıym jabyldy. Al gýmanıtarlyq júıe qyzmetkerleriniń 380-nen astamy qaza tapty, bul rekordtyq kórsetkish, — dedi BUU basshysynyń orynbasary.
BUU-nyń tótenshe kómek úılestirýshisi sondaı-aq gýmanıtarlyq qurylymdardyń qyzmetkerleri qarjylyq tapshylyq jaǵdaıynda jáne tolassyz soqqynyń kezinde jumys istep jatqanyn atap ótti.
Onyń aıtýynsha, gýmanıtarlyq qaýymdastyq ótinishteriniń tek 20 paıyzy ǵana qarjylandyrylady.
Aıta ketelik BUU Qaýipsizdik keńesi Ýkraınaǵa qatysty jıyn ótkizetini týraly jazǵan edik.